Sý tasqynynan zardap shekken úılerdi jóndeýge 257 mlrd teńge qajet
ASTANA. KAZINFORM – Sý tasqynynan zardap shekken úılerdi jóndeýge 257 mlrd teńge qajet. Bul týraly Úkimet otyrysynda Premer-Mınıstrdiń orynbasary Qanat Bozymbaev aıtty.
«Úkimet sý tasqyny saldaryn joıý jáne zardap shekken azamattarǵa jan-jaqty kómek kórsetý boıynsha jumysty jalǵastyryp otyr. Shamamen 67 myń adam óz úılerine oraldy, evakýatsııalyq pýnktterdegi 3664 turǵynǵa barlyq qajetti kómek kórsetilýde. Sý tasqyny bastalǵannan beri barlyǵy 12 086 turǵyn úı men 7 380 jalǵyz baspana saıajaı qurylystary sý astynda qaldy. Jalpy zardap shekken óńirlerde 18 228 turǵyn úı zertteldi. Bul — 94 paıyz. 15 651 nysan boıynsha baǵalaý aıaqtaldy. Bul — 81 paıyz», — dedi Úkimet basshysynyń orynbasary.
Onyń atap ótýinshe, qazirgi ýaqytta zertteý qorytyndylaryna sáıkes 9 306 baspana qalpyna keletin sanatqa jatqyzyldy. 8 190 baspana qalpyna keltirilmeıtin sanatqa jatqyzylyp, olar boıynsha qaıtalama naryqtan 5 714 baspana satyp alý jáne 2576 tıptik jobada baspana qurylystary josparlanǵan.
«Jalpy, turǵyn úıdi qalpyna keltirýge shamamen 257 mlrd teńge qajet. Qazirgi ýaqytta 6 176 otbasy jalpy somasy 40 mlrd teńgege baspana jóndeýge jáne qalpyna keltirýge ótemaqy aldy. Zardap shekken aımaqtarda búginde 3 414 otbasyna qıraǵan turǵyn úıdiń ornyna jańa úıler men páterler satyp alyndy nemese ótemaqy tólendi. Zardap shekken azamattarǵa arnalǵan 2 500 jańa baspana qurylysy júrgizilýde. 33 321 otbasy 12 mlrd teńgeden astam somaǵa 100 AEK mólsherinde birjolǵy tólem aldy. Bul jumys Qaraǵandy, Pavlodar, Aqmola, Abaı jáne Ulytaý oblystarynda tolyq aıaqtaldy. Aqtóbe, Batys Qazaqstan, Soltústik Qazaqstan, Qostanaı, Atyraý oblystarynda tólemder jalǵasýda», — dedi Qanat Bozymbaev.
