Sý tasqynynan zardap shekken turǵyndardyń tezirek qalypty ómirge oralýyn qamtamasyz etýimiz kerek – Oljas Bektenov
ASTANA. KAZINFORM – Atyraý oblysynda eldi mekenderdi sý basyp qalý qaýpi saqtalyp otyr. Bul týraly búgin Úkimet otyrysynda Premer-Mınıstr Oljas Bektenov aıtty.
«Kórip otyrǵanymyzdaı, Atyraý oblysynda eldi mekenderdi sý basyp qalý qaýpi saqtalyp otyr. Sondyqtan tıisti qurylymdar tasqynǵa qarsy jumystardy jalǵastyrýy qajet. Ásirese, Inderbor jáne Mahambet eldi mekenderindegi jaǵdaıdy erekshe baqylaýǵa alý kerek. Onda Jaıyq ózeni qaýipti deńgeıden asyp ketti. Evakýatsııalyq beketter kez kelgen ýaqytta adamdardy qabyldaýǵa daıyn bolýǵa tıis. Kúshter men quraldar da saqadaı saı turýy kerek. Sý resýrstary mınıstrligi men Atyraý oblysynyń ákimdigi Jaıyq ózenindegi sý deńgeıine turaqty monıtorıng júrgizýdi qamtamasyz etsin. Sonymen qatar Aqtóbe oblysynda 2 eldimekende áli kúnge deıin kólik qatynasy joq. Onda azyq-túlik pen dári-dármekterdiń bolýyn muqııat baqylaýǵa alý kerek. Elektr jaryǵynsyz otyrǵan aýyldar da bar. Jóndeý jumystaryn tezdetý kerek», - dedi Úkimet basshysy.
Sonymen qatar ol sý tasqyny jaǵdaıy turaqtalǵan óńirlerde ákimdikter baǵalaý jáne jobalaý jumystaryn kúsheıtýi tıistigin basa aıtty.
«Keltirilgen zalaldy óteý, onyń ishinde úıler men ınfraqurylymdy qalpyna keltirý jónindegi barlyq sharalar belgilengen merzimde iske asyrylýy qajet. Biz zardap shekken turǵyndardyń múmkindiginshe tezirek qalypty ómirge qaıta oralýyn qamtamasyz etýimiz kerek», - dedi Oljas Bektenov.
