Sý tasqynynan zardap shekken oqýshylar aralyq jáne qorytyndy emtıhannan bosatyldy

ASTANA. KAZINFORM – Sý tasqynynan zardap shekken úsh óńirde 3,5 myńnan astam oqýshy aralyq jáne qorytyndy emtıhan tapsyrmaıdy. Bul týraly QR oqý-aǵartý mınıstri Ǵanı Beısembaev Úkimet otyrysynda baıandady.

Olardyń qatarynda Atyraý, Aqtóbe jáne Soltústik Qazaqstan oblystarynyń bilim alýshylary bar. Oqýshylardyń qorytyndy baǵasy jyldyq baǵalary negizinde shyǵarylady.

«Sý tasqynynan zardap shekken jáne aýa raıynyń qolaısyzdyǵyna baılanysty qys mezgilinde qashyqtan oqyǵan 2622 mekteptiń 832 myń oqýshysy úshin 27-31 mamyr aralyǵynda «Jazǵy mektep» jumysy uıymdastyrylady. Jazǵy mektepti uıymdastyrýdyń negizgi maqsaty – oqýshy bilimindegi olqylyqtardyń ornyn toltyrý arqyly bilim sapasyn arttyrýǵa baǵyttalǵan», - dedi Oqý-aǵartý mınıstri.

Eske sala ketsek, bıyl 3,8 mln oqýshy kezekti oqý jylyn aıaqtaıdy. 9 jáne 11-synyptardy bitirýshiler úshin qorytyndy emtıhandar 29 mamyr-11 maýsym kúnderi ótedi.

Sondaı-aq, bıyl alǵash ret 5-8, 10-synyptarda qazaq tilin meńgerýdi baǵalaý maqsatynda qazaq tilinde jáne basqa tilde oqytatyn mektepterdiń bilim alýshylary úshin aralyq emtıhandar ótkiziledi.