Sý tasqynynan zardap shekken muǵalimderdiń tizimi jasalyp jatyr

ASTANA. KAZINFORM — Sý tasqynyna baılanysty rezerv retinde balalar men olardyń ata-analary úshin qosymsha 7 myń oryn ázirlendi. Bul týraly QR Oqý-aǵartý mınıstrliginiń resmı ókili Mereke Nurmuhanova málim etti.

«Sý tasqyny bastalǵan kezden Oqý-aǵartý mınıstrligi oqý protsesin sapaly uıymdastyrý jáne balalardy ornalastyrý boıynsha jumystardy júıeli túrde iske asyryp keledi. Qazirgi kezde osyǵan deıin evakýatsııalyq pýnktterde bolǵan 4 myńǵa jýyq bala ata-analarymen birge yńǵaıly oryndarǵa ornalastyryldy. Onyń ishinde 600-ge jýyq oqýshy saýyqtyrý ortalyqtaryna, 2 myńǵa tarta bala kolledjder men joǵary oqý oryndarynyń jataqhanalaryna, taǵy 600-ge jýyq bala respýblıkalyq mańyzdaǵy ınnovatsııalyq mektep-lıtseı jataqhanalaryna jiberildi. Rezerv retinde balalar men olardyń ata-analary úshin qosymsha 7094 oryn ázirlendi», — M. Nurmuhanova ortalyq kommýnıkatsııalar qyzmetindegi brıfıngide.

Sonymen qatar ol oqýshylar qajet oqý quraldarymen, tamaqtandyrýmen jáne kıimmen qamtamasyz etilgenin aıtty.

QTJ kompanııasymen birge balalar saýyqtyrý ortalyqtaryna tegin tasymaldandy. 

«Atap aıtqanda, sý tasqynynan zardap shekken óńirlerdegi balalar úshin emtıhan tapsyrý merzimderi qaıta qaraldy. Budan buryn Aqtóbe jáne Atyraý oblystarynda TJB men BJB ótkizilmeıtini habarlandy. Qazir Soltústik Qazaqstan oblysynyń zardap shekken eldi mekenderinde turatyn balalar úshin de TJB men BJB-ny alyp tastaý sheshimi jasaldy. Aqmola jáne Batys Qazaqstan oblystarynda sheshim jaǵdaıǵa qaraı qabyldanady», — dedi resmı ókil.

Onyń sózine qaraǵanda, qazir keltirilgen shyǵyndy anyqtaý jáne sý tasqynynan zardap shekken pedagogterdiń tizimin qurý jumystary iske asyrylyp jatyr.

Jekemenshik bilim berý uıymdarynyń qaýymdastyǵy zardap shekkenderge kómek qoryn ashty.

Usynylǵan derekterge sáıkes, 12 mln teńgeden astam qarjy jınalǵan.