Sý tasqynynan zardap shekken Makınsk qalasynyń turǵyndary baspanaly boldy
ASTANA. KAZINFORM – Aqmola oblysy Bulandy aýdany Makınsk qalasynyń sý tasqynynan zardap shekken turǵyndaryna 11 jańa úı satyp alyndy.
Úıleri sý tasqynynan zardap shekken Makınsk qalasynyń turǵyndaryna kiltterdi Bulandy aýdanynyń ákimi Ardaq Smaıylov tabys etti. Bulandy aýdany ákimdiginiń baspasóz qyzmeti habarlaǵandaı, bul iske Bolat Ótemuratov atyndaǵy qor kómektesip, 11 jańa úı alýǵa qarjylaı demeýshilik kómek kórsetti.
«Bıylǵy kóktemde sý tasqyny kezinde úıimizdi sý basyp, kórshilerdiń úıinde turýǵa týra keldi, endi qýanyshta shek joq, osyndaı qoldaýlaryńyz ben kómekterińiz úshin alǵys aıtamyn», - deıdi qala turǵyny Álııa Jaqsymuratova. Makınsk qalasy.
Bıylǵy kóktemgi sý tasqyny kezinde Makınsk qalasynda barlyǵy 36 úı zardap shekse, onyń 20-syna múlkine ótemaqy retinde qarjy berildi. Zardap shekkenderge aýdanda áli bes úı satyp alýǵa qaldy.