Sý tasqynynan zardap shekken qulsarylyq turǵyn jańa úıinde daýys berdi

ATYRAÝ. KAZINFORM – Kóktemgi sý tasqynynan zardap shekken Qulsary qalasynyń turǵyny jańa úıinde daýys berdi.

Jylyoı aýdandyq aýmaqtyq saılaý komıssııasynyń málimetinshe, munda 24 referendým ýchaskesi qurylǵan. Daýys berýshiler tizimine 48 myń 473 adam engizilgen.

Daýys berýshiniń biri – Baýyrjan Jasaqbaev. Bıyl sáýirde Jem ózeni arnasynan asyp, Qulsary qalasyna kirgen tasqyn sýdan onyń úıi búlingen.

«Jaqynda «Bolashaq shaǵyn aýdanynda salynǵan jańa úıge kóship keldik. Alaıda, densaýlyq jaǵdaıyma baılanysty referendým ýchaskesine bara almadym. Meniń ótinishimdi eskergen referendým komıssııasynyń músheleri úıime kelip, daýys berýime múmkindik jasady. El azamaty retinde referendýmnan tys qalmaı, ózimniń daýysymdy berdim. Óıtkeni, bul referedýmda ár daýystyń zor mańyzǵa ıe ekenin bilemin», - deıdi Baýyrjan Jasaqbaev.

Eske sala ketelik, budan buryn «Teńiz» ken ornynda 10 myń jumysshy 7 pýnktte óz tańdaýyn jasaǵanyn jazǵan edik.

Sondaı-aq, Atyraý oblysynda 104 jastaǵy áje úıinde daýys bergenin habarladyq.

Al, áskerden oralǵan egiz sarbaz ben egiz zeınetker ýchaskege birge keldi.