Sý tasqynynan zardap shekken qazaqstandyqtarǵa 4 790 salynǵan jáne satyp alynǵan úı men páterler berildi
ASTANA. KAZINFORM - Úkimet sý tasqynynan zardap shekken turǵyndardy qoldaý jáne turǵyn úıdi qalpyna keltirý boıynsha júrgizilip jatqan jumysty turaqty baqylaýda ustap otyr, dep habarlaıdy Úkimettiń baspasóz qyzmeti.
34 068 otbasyna bir rettik 100 AEK kóleminde ótemaqy tólendi. Osy maqsattarǵa barlyǵy 12,5 mlrd teńgeden astam qarajat jumsaldy. Baǵalaý aıaqtalýyna qaraı joǵalǵan eń qajetti zattaryn satyp alý úshin 150 AEK-ke deıingi mólsherde qosymsha tólemder de júzege asyrylady. Búgingi tańda 21 800 otbasy jalpy somasy 9,9 mlrd teńgege tıisti ótemaqy aldy.
Qazirgi ýaqytta barlyq oblysta turǵyn úı men saıajaı qurylysyn tekserý jáne baǵalaý jumysy tolyǵymen aıaqtaldy.
Sý tasqynynan zardap shekken qazaqstandyqtarǵa 4 790 salynǵan jáne satyp alynǵan úı men páter berildi.
Máselen, 323 jańa úı salynyp, paıdalanýǵa berildi. Soltústik Qazaqstan oblysynda 235 otbasy, Qostanaı oblysynda – 57, Aqtóbe oblysynda – 26 jáne Pavlodar oblysynda – 5 otbasy jańa úıdiń kiltin aldy. Sý tasqynynan zardap shekken óńirlerde kúzge deıin barlyǵy 2 568 úı salyp, tapsyrý josparlanǵan, jumys qarqyndy júrgizilip jatyr.
4 467 otbasy úshin qıraǵan baspanasynyń ornyna jańa úı men páterler satyp alyndy. Qostanaı oblysynyń turǵyndaryna 315 turǵyn úı berilse, Aqmolada – 219, Atyraýda – 1372, Aqtóbede – 447, Soltústik Qazaqstanda – 1102, Batys Qazaqstanda – 1004, Qaraǵandy – 6 jáne Pavlodarda – 2 turǵyn úı berildi.
Komıssııa sheshimderiniń qorytyndysy boıynsha jalpy somasy 48,2 mlrd teńgege 8 717 otbasy turǵyn úıin jóndeýge jáne qalpyna keltirýge ótemaqy aldy.
Sonymen qatar zardap shekken bızneske keltirilgen shyǵyndy óteý boıynsha jumys júrgizilýde. Óńirlik komıssııalar ShOB sýbektileriniń jalpy somasy 5,8 mlrd teńgege 374 ótinimin qarap, maquldady. Sýǵa ketken mal úshin berilgen memlekettik kómek kólemi 2,8 mlrd teńgeden asty.
