Sý tasqynynan zardap shekken qazaqstandyqtar nesıe boıynsha boryshyn keıin tóleı alady
ASTANA. KAZINFORM – Qazaqstandyq ekinshi deńgeıli bankter sý tasqynynan zardap shekken azamattarǵa nesıe boıynsha boryshyn óteý merzimin keıinge qaldyrýǵa daıyn.
Qazaqstan qarjygerler qaýymdastyǵynyń habarlaýynsha, bankter sý tasqynynan zardap shekkender sanatyna jatqyzylǵan jeke jáne zańdy tulǵalarǵa nesıe boıynsha boryshtaryn óteý merzimin 2024 jyldyń 1 sáýirinen 30 maýsymyna deıin keıinge qaldyrýǵa daıyn ekenin rastady.
Tıisti tizimderdi ákimdikter shyǵarady. Bul tizimderge kirgen azamattarǵa tólemdi keshiktirgeni úshin aıyppul men ósimpul salynbaıdy.
Jaqyn arada bankter óz saıttarynda jáne áleýmettik jelilerde keıinge qaldyrylǵan boryshty óteý boıynsha merzimdi uzartýdy usynýdyń naqty mehanızmderin, sondaı-aq ótinimderdi berý algorıtmin jáne odan keıingi áreketterdi jarııalaıdy.
Búgin Sý tasqynyna qarsy sharalardy úılestirý jáne qarǵyn sý júrý kezeńiniń saldaryn joıý jónindegi respýblıkalyq shtabtyń otyrysynda Memleket basshysy Qasym-Jomart Toqaev sý tasqynynan zardap shekkenderge kómek kórsetý úshin Úkimettiń, ákimdikterdiń jáne «Qazaqstan halqyna» qorynyń qarjysyn paıdalanýdy tapsyrdy.
Sondaı-aq Prezıdent otandyq bıznesten shette qalmaı, azamattarǵa kómektesýge shaqyrdy.
Buǵan deıin Astanadan óńirlerge 30 tonnadan astam gýmanıtarlyq kómek jiberilgeni týraly habarlaǵan bolatynbyz.
