Sý tasqynynan zardap shekken balalarǵa saýyqtyrý ortalyqtaryna joldama beriledi
ASTANA. KAZINFORM – Oqý-aǵartý mınıstrligi óńirlik bilim basqarmalarymen birlesip, ýaqytsha ornalastyrý pýnktterine jetkizilgen balalardyń jaǵdaıyn nazarda ustap otyrǵanyn jetkizdi. Eń kóp zardap shekken aımaqtarda turatyn balalarǵa saýyqtyrý ortalyqtaryna joldamalar bólingen.
Ortalyq kommýnıkatsııalar qyzmetinde ótken brıfıngte vedomstvonyń resmı ókili Mereke Amangeldiqyzy ýaqytsha ornalastyrý pýnkterindegi balalarǵa psıhologııalyq qyzmetterdiń jumysy uıymdastyrylǵanyn aıtty. Qashyqtan oqý úshin balalar qajetti oqý quraldary jáne tehnıkalyq quraldarmen qamtamasyz etilgen.
«Aqmola oblysynyń «Jas dáýren» lagerine 80-nen astam bala barady.
Budan bólek, oqýshylar respýblıkalyq mańyzy bar ınnovatsııalyq mektep-lıtseılerdiń jataqhanalarynda ornalastyrylady. Mańǵystaý oblysynyń qosymsha 28 bilim berý uıymy Atyraý oblysynyń Qulsary qalasynan evakýatsııalanǵan turǵyndardy qabyldaıdy. Sý tasqyny jaǵdaıy baıqalatyn óńirlerde barlyǵy 127 bilim berý nysany turǵyndardy ýaqytsha ornalastyrý pýnkteri bolyp belgilendi. 20 myńǵa jýyq bilim berý qyzmetkeri sý tasqynyna qarsy is-sharalarǵa eriktiler retinde qatysady, olardyń 10 myńnan astamy evakýatsııa pýnktterinde. Salalyq kelisimge sáıkes, TJ qoldanylý kezeńinde bilim berý qyzmetkerleriniń jalaqysyn esepteý TJ engizilgenge deıin belgilengen mólsherde júrgiziledi», - dedi ol.
Aıta keteıik, Oqý-aǵartý mınıstrligi muǵalimderdi qoldaý máselesin de pysyqtap jatyr. Tótenshe jaǵdaı jarııalanǵan óńirlerde pedagogtardy attestattaýdan ótý kúnderi neǵurlym kesh merzimge aýystyrylmaq.
