Sý tasqynynan zardap shekken aımaqtardan 1000-ǵa jýyq bala «Baldáýren» lagerinde demaldy

ASTANA. KAZINFORM – Sý tasqynynan zardap shekken aımaqtardan 1000-ǵa jýyq bala «Baldáýren» respýblıkalyq oqý-saýyqtyrý ortalyǵynda demaldy. Bul týraly QR Oqý-aǵartý mınıstrligi habarlady. 

«Baldáýren» respýblıkalyq oqý-saýyqtyrý ortalyǵynda kelesi aptada jańa maýsym bastalady. Bıylǵy jazda bul ortalyq 6000-nan astam balany qabyldaıdy. 

Respýblıkalyq oqý-saýyqtyrý ortalyǵy jazǵy kezeńde árqaısysy 15 kúnnen turatyn bes aýysym ótkizedi, árbir aýysym rýhanı-adamgershilik, patrıottyq tárbı berý, balalardyń fızıkalyq damýy sekildi túrli baǵyttardy qamtıdy.

«Bıylǵy jyldyń basynan ortalyqta 5800 bala demaldy, olardyń 842-si zardap shekken aımaqtardan kelgen balalar. Kelesi aptada jańa maýsymǵa Atyraý jáne Soltústik Qazaqstan oblystarynan taǵy 17 bala keledi dep kútilýde. Jazdyń sońyna deıin sý tasqynynan zardap shekken aımaqtardan 1000-ǵa jýyq balany demalyspen qamtý josparlanyp otyr», - dep habarlady «Baldáýren» ROSO baspasóz qyzmeti.

Aıta keteıik, ortalyq ártúrli qurylymdyq bólimshelerden turady: bilim berý, tárbıe, medıtsınalyq, dene shynyqtyrý keshenderi.

Sý tasqyny bastalǵaly beri túrli respýblıkalyq saýyqtyrý ortalyqtarynda 1083 bala demaldy. Jazǵy kezeńde demalyspen taǵy 3,7 myńǵa jýyq bala qamtylady.