Sý tasqynynan zardap shekken 1054 aqmolalyqqa birjolǵy tólemder jasaldy

KÓKShETAÝ. KAZINFORM - Aqmola oblysynda sý tasqynynan zardap shekken 1054 adamǵa birjolǵy tólemder jasaldy. Sonymen birge 74 otbasyna jóndeý jumystarynyń shyǵyndary óteldi.

Óńirde sý tasqynynyń kezeńi aıaqtalyp keledi. Ózenderdegi sýdyń deńgeıi birtindep tómendep, eldi mekenderdi sý basý qaýpi seıilgen. Al sý basqana eki áleýmettik nysanda (Atbasardaǵy mektep jáne Kókshetaýdaǵy balabaqsha) tolyq jóndeý jumystary júrgizilýde. 

«Óńirde sý tasqyny kezinde barlyq resýrstar jumyldyryldy. Eldi mekenderdi qorǵaý úshin jalpy uzyndyǵy 45 km topyraqtan bógetter turǵyzyldy, 18 km ózenderdiń jaǵalaýy nyǵaıtyldy. Inertti materıal toltyrylǵan 330 myńǵa jýyq qap tóseldi. 3,5 mln tekshe metr sý soryldy, on eki ózenniń 53 ýchaskesinde muz keptelisteri joıyldy», - dedi sý tasqynynyń zardaptaryn joıý boıynsha ótken jıynda aımaq basshysy Marat Ahmetjanov.

Aıtýynsha, sý tasqynyna qarsy sharalarǵa QR Tótenshe jaǵdaılar mınıstrligi, Memlekettik kúzet qyzmeti, Іshki ister mınıstrligi, Qorǵanys mınıstrligi, atqarýshy organdar, Málik Ǵabdýllın atyndaǵy azamattyq qorǵaý akademııasy, sondaı-aq, volonterlar men jergilikti turǵyndar jumyldyryldy. 

«Sonyń arqasynda qaýipti aımaqta ornalasqan 95 eldi mekende 8 myń úıdiń sý basýyna jol berilmedi. Endigi kezekte, sý tasqynynyń naqty qaýip ótken soń onyń zardaptaryn joıýǵa kirisemiz. Oblystyń barlyq aýdandary men qalalarynda materıaldyq zalaldy anyqtaý jónindegi komıssııalar quryldy jáne keltirilgen múliktik zalaldy baǵalaý úshin táýelsiz sarapshylar tartyldy. Sonymen qatar, oblystyq deńgeıde apellıatsııalyq komıssııa quryldy, máselen, turǵyndardyń biri baǵalaý komıssııalarynyń sheshimimen kelispese, óz quqyqtaryn buzylǵan dep sanasa, yqtımal daýly máselelerdi osy komıssııa arqyly retteýge bolady. Barlyq zardap shekkenderge 100 aılyq eseptik kórsetkish mólsherinde birjolǵy tólemder tólenedi, ony 1054 adam aldy. Aqkól, Arshaly, Ereımentaý, Jaqsy, Zerendi jáne Tselınograd aýdandaryndaǵy 74 otbasyna úılerin jóndeýge jumsalǵan jumystardyń shyǵyndary óteldi. Sý basý aımaqtarynan 28 myń bas mal qutqarylyp, ıelerine qaıtaryldy», - dep qosty Marat Ahmetjanov.

Oblys basshysy atap ótkendeı, bıylǵy kóktemdegi sý tasqynynan qorytyndy shyǵaryp, keler jyly mundaıǵa jol bermeý úshin barlyq sharalar qolǵa alynatyn bolady. Onyń ishinde, eń aldymen Qylshaqty jáne Jabaı ózenderiniń túbin tereńdetip, arnasyn tazartý josparlanǵan.
Aıta ketsek, budan buryn Kókshetaýda sý tasqynynan zardap shekken 8 otbasy baspanaly bolǵanyn jazǵan edik.