Sý tasqynynan zardap shekken 1 553 úıdi qaıta salý qajet
ASTANA. KAZINFORM – Elimiz boıynsha sý tasqynynan zardap shekken 11 865 turǵyn úı bar. Bul týraly Ónerkásip jáne qurylys mınıstrliginiń resmı ókili Merýert Ibraeva aıtty.
«Ózderińiz biletindeı, Memleket basshysy Qasym-Jomart Toqaevtyń tapsyrmasy boıynsha Ónerkásip jáne qurylys mınıstrliginde sý tasqynynyń saldaryn ýaqytyly joıý úshin Jedel shtab qurylyp, onyń músheleri sý basqan aýmaqtardyń árqaısysyn aralap, jaǵdaımen tanysqan. Sondaı-aq zardap shekken aımaqtardyń jaǵdaıyn kúndelikti baqylap otyratyn Ahýaldyq ortalyq qyzmet etýde. Jergilikti atqarýshy organdardyń jedel aqparatyna sáıkes, búgingi tańda 5 678 turǵyn úı sý astynda qalyp otyr. Onyń ishinde: 5 607-si jeke turǵyn úı jáne 71-i kóp páterli turǵyn úır, sondaı-aq 17 907-si saıajaı úıleri», — dedi ol ortalyq kommýnıkatsııalar qyzmetindegi brıfıngte.
Resmı ókil usynǵan derekke sáıkes, aımaqtar boıynsha jaǵdaı mynadaı:
— Aqmola oblysy: jeke turǵyn úı — 907, kópqabatty turǵyn úı — 28;
— Atyraý oblysy: jeke turǵyn úı — 1 082, saıajaılar — 30;
— Aqtóbe oblysy: 44 jeke turǵyn úı;
— Qostanaı oblysy: 7 saıajaı;
— BQO: 14 839 saıajaı
— SQO: jeke turǵyn úı — 3 574, kópqabatty turǵyn úı — 43 saıajaı úıleri — 3 031.
«Búgingi tańda sý tasqynynan zardap shekken 11 865 turǵyn úı bar. Onyń ishinde jeke turǵyn úı — 11 794 jáne kópqabatty turǵyn úı — 71, sondaı-aq 24 368 saıajaı nysany bar. Bul rette 2 947 turǵyn úı nysany boıynsha tehnıkalyq tekserý júrgizildi. Onyń qorytyndysy boıynsha 1 553 úı qaıta salýdy, 1 394 úı jóndeýdi qajet etedi», — dedi Merýert Ibraeva.
Onyń atap ótýinshe, jergilikti atqarýshy organdardyń aldyn ala derekteri boıynsha 8 097 daıyn jer ýchaskesi bar.
Atap aıtqanda:
— Aqmola oblysynda — 335 jer ýchaskesi;
— Atyraý oblysynda — 3 465;
— Aqtóbe oblysynda — 409;
— Qostanaı oblysynda — 2 189;
— BQO-da — 188;
— SQO-da — 1 500;
— Qaraǵandy oblysynda — 6;
— Pavlodar oblysynda — 5.
«Zardap shekken úılerdi qalpyna keltirýdiń úsh mehanızmi bar. Olar: jańa turǵyn úı qurylysy; qoldanystaǵy turǵyn úıdi jóndeý; qaıtalama naryqta daıyn turǵyn úıdi satyp alý. Barlyq ótinishter eGov portaly arqyly, onyń ishinde eGov-mobile mobıldi qosymshasy arqyly qabyldanady. Kelesi kezekte ákimdikter tehnıkalyq baıqaý jáne zalaldy baǵalaý jumystaryn uıymdastyrady, sodan keıin obektiler jergilikti atqarýshy organnyń óńirlik komıssııasynyń qaraýyna beriledi. Ákimdik komıssııasy árbir nysan boıynsha sheshim qabyldaıdy, odan keıin barlyq obektiler paıdalanýǵa, baqylaýǵa alynyp, monıtorıng júıesine engiziledi. Jer ýchaskesi berilgen sátten bastap turǵyn úı paıdalanýǵa berilgenge deıin árbir nysan boıynsha monıtorıng júrgiziledi», — dedi resmı ókil.
