Sý tasqynynan soń ótemaqy alǵan aqtóbelikter baspanasyn jóndeýge kiristi
AQTÓBE. KAZINFORM — Aqtóbe qalasy boıynsha 3600-ge jýyq úıge tehnıkalyq tekserý júrgizilip, basym bóligine baǵalaý komıssııasynyń qorytyndysy shyǵaryldy. Qazirgi kezde 172 úı jaramsyz kúıde. Al 501 otbasyna 2,2 mlrd teńge ótemaqy tólendi. Qazir qala turǵyndary baspanasyn jóndeýge kirisken.
Aqtóbe qalasynda kóbine saıajaı aýmaǵyndaǵy úılerge sý kirgen. 3600-den astam úıge tehnıkalyq tekserý júrgizilgen bolsa, onyń 3200-den astamy baý-baqsha ujymynda ornalasqan.
Qala ákimi baspasóz qyzmetiniń habarlaýynsha, 501 otbasyna 2,2 mlrd teńge ótemaqy tólendi.
Komıssııa qorytyndysy boıynsha ázirge 172 úı turýǵa jaramsyz. Olarǵa jańa páter beriledi. Qarjy «Ótemuratov qorynan» aýdarylady.
— Ázirge eshkim úı alǵan joq. Qazirgi kezde «Ótemuratov qory» páterlerdi satyp alyp jatyr. Osy aıda berip bastaıdy. Jańa úılerdiń páterleri qaralama nusqada satylady. Ony áktep, daıyn kúıinde berý ýaqyt alady. Ony turǵyndarmen kezdesýde túsindirdi, — dedi Aqtóbe qalasy ákiminiń baspasóz hatshysy Aıgúl Baımenova.
Qazirgi kezde ótemaqy alǵan turǵyndar úıdi keptirý, qajetti qurylys materıaldaryn satyp alý jáne jóndeý jumystaryn júrgizip jatyr.
Kóbi óz kúshimen jumysyn bastasa, keıbiri týǵan-týystaryn shaqyryp, úme jasaǵan. Úıdiń úlkenderi ylǵal bolsa óz baspanasyna qonady, al balalary evakýatsııalyq pýnkterge ornalasqan.
— Meniń úıimdegi sý tizemen birdeı boldy. Úıdegi tehnıkamyz sýǵa ketti, jıhazymyz da isindi. Úıge sý kirip, evakýatsııa jasalǵanda daıyndap qoıǵan jerge bardyq. Sodan beri sonda turamyz. Al qazir kúndiz úıge kelip-ketip júrmiz. Jaramsyz zattardy shyǵaryp, keptirip, tipti áktep te qoıdyq. Úıimniń qujaty joq. Jer alyp, ózip eki bólme salyp alǵan edim. Sodan qujaty jasalmaı qaldy. Bizge qalada qurylǵan qordan 1 mln 900 myń teńge berdi, — dedi Amangeldi Myrjaqypov.
Ol bul qarjyǵa kireberis bólmesin salyp alýdy josparlap otyr. Otbasy gaz qubyryn tarta almaı, qysta ot jaǵady.
Al Muratbaı Ábdibakıev úsh bólmeli úıi úshin 3,8 mln teńge aldy. Otbasynda 7 jan bar.
— Bul úı ákemniń atynda. Ol qujattarmen júgirip, aryz-shaǵymyn aıta almaıdy. Senimhatty áıelime berip, baǵalaý qorytyndysy shyqqanda kelisimmen qol qoıǵan. Biraq bizge bólingen aqsha az. Qazir úı ylǵal, sonda da edenge aǵash tósep, osynda qonamyz. Evakýatsııalyq pýnktte ý-shý bolǵan soń qıyn. Onda tek balalarym bar. Balamnyń biri ekinshi top múgedegi, — dedi Muratbaı Ábdibaqıev.
Aqtóbelik turǵyn aldaǵy ýaqytta úı ishin keptirip, qabyrǵalaryn syrlap almaq. Qurylys jumystarynyń bárin ózi jasaýdy josparlap otyr.
Aıta keteıik, Aqtóbe oblysy boıynsha sý tasqynyna qarsy kúres jumysy aıaqtaldy. Qazirgi kezde barlyq aýdanda úı salynyp jatyr.
Tek Yrǵyzdyń Nura aýylynda naqty sheshim shyqpady.
