Sý tasqynynan respýblıkalyq joldarǵa 8,5 mlrd teńge shyǵyn keldi – Kólik mınıstri

ASTANA. KAZINFORM – Kóktemde sý shaıǵan respýblıkalyq jáne jergilikti joldar qaıta qalpyna keltirilip jatyr. Bul týraly Kólik mınıstri Marat Qarabaev aıtyp berdi.

«Tasqynnan keıin jol ýchaskeleri men qurylystaryn qalpyna keltirý jumystary jalǵasyp jatyr. Respýblıkalyq joldar boıynsha 122 ýchaskeni sý shaıdy, odan kelgen shyǵyn 8 mlrd 500 mln teńgeni qurady. Qalpyna keltirý jumystaryna tolyq kólemde qarjy bólý kózdelgen. Búginde respýblıkalyq bıýdjet esebinen 102 ýchaskede jumystar tolyǵymen aıaqtaldy, al qalǵan 20 ýchaskeni qalpyna keltirý Qazaqstan Damý Bankiniń qarajaty esebinen júrgizilýde. Jol qurylystary merziminde aıaqtalady», - dedi Marat Qarabaev Úkimet otyrysynda.

Odan ári mınıstr 10 óńirde jergilikti joldardy sý shaıyp, buzylǵanyn málim etti.

«Barlyǵy sý basqan 414 ýchaske anyqtaldy, oǵan jergilikti bıýdjet esebinen qarjy bólinip, 233 ýchaskede qalpyna keltirý jumystary tolyq aıaqtaldy. Jalpy tasqyn kezinde 30 myńǵa jýyq jolaýshy qaýipsiz jerge jetkizildi. Sondaı-aq, topan sý basqan óńirlerge 10 myń tonnadan astam gýmanıtarlyq kómek jetkizildi», - deıdi vedomstvo basshysy.

Aıta keteıik, 2025 jyly el aýmaǵynda tasqyndy boljaý jáne modeldeý aqparattyq júıesin engizý josparlanyp otyr.