Sý tasqynynan maldyń qyrylýy et baǵasyna áser ete me
ASTANA. KAZINFORM — QR Aýyl sharýashylyǵy mınıstrligi sý tasqyny kezinde qyrylǵan malǵa qatysty túsinik berdi.
Bul turǵyda mınıstrlik elimiz boıynsha jalpy mal basyna shaqqanda sý tasqyny kezinde ólgen maldyń úlesin naqtylady. Máselen, jalpy kólemge qaraǵanda, qyrylǵan usaq maldyń úlesi – 0,02%, iri qara – 0,03%, jylqy – 0,06%, túıe boıynsha 0,00001 paıyzdy qurady.
«2024 jylǵy 16 mamyrdaǵy jaǵdaı boıynsha ólgen mal men qustardyń sany 10 258 basty qurady. Onyń ishinde usaq mal – 5279 bas, iri qara – 2581, jylqy – 1140, túıe – 4, sondaı-aq 1024 bas qus bar (Abaı oblysy – 129, Aqtóbe oblysy – 3232, BQO – 2457, Ulytaý oblysy – 237, Qostanaı oblysy – 2467, Aqmola oblysy – 510, Atyraý oblysy – 1110, Qaraǵandy oblysy – 89, Soltústik Qazaqstan oblysy – 27)», - delingen mınıstrliktiń Kazinform agenttigen bergen jaýabynda.
Vedomstvo aqparatynda óńirlerde sý tasqynynan bolǵan shyǵynnyń úlesi joǵary bolýy múmkin ekeni atap ótilgen. Eldiń kólik ári saýda logıstıkasy turaqty jumys istep turǵandyqtan, mal sharýashylyǵy ónimderi men óńdelgen taýarlardy bir óńirden ekinshisine emin-erkin tasymaldaýǵa kedergi joq.
«Sondyqtan barlyq óńirlerdegi suranys pen usynys tepe-teńdigi dereý teńestiriledi. Joǵaryda aıtylǵandardy eskersek, sý tasqynynan maldyń qyrylýyna baılanysty dúken sórelerinde ettiń aıtarlyqtaı tapshylyǵy men baǵasynyń ósýi bolmaıdy dep sanaımyz. Bul rette, ınflıatsııa sheginde et baǵasynyń ósýin joqqa shyǵarýǵa bolmaıdy», - dep atalyp ótken mınıstrlik málimetinde.
