Sý tasqynynan qyrylǵan mal úshin ótemaqy: Qostanaıda sot komıssııa sheshimin ózgertti
ASTANA. KAZINFORM — Qostanaı oblysynda sot 2024 jylǵy sý tasqyny kezinde qyrylǵan 10 bas usaq mal úshin ótemaqy tóleýden bas tartýdy zańsyz dep tanydy, dep habarlaıdy Kazinform agenttiginiń tilshisi.
Oblystyq sottyń málimetinshe, 2024 jyldyń sáýir aıynda Qostanaı aýdanynyń aýmaǵynda tabıǵı sıpattaǵy tótenshe jaǵdaı jarııalanǵan. Jergilikti turǵyndardyń biri sý tasqyny saldarynan kelgen shyǵyndy óteý týraly ótinish bergen.
Komıssııa úsh usaq mal úshin ótemaqy tóleýdi maquldaǵanymen, taǵy 10 janýarǵa qatysty shyǵyndy óteýden bas tartqan. Buǵan maldyń aýyl sharýashylyǵy janýarlaryn sáıkestendirý aqparattyq júıesinde tirkelgeni týraly málimetterdiń bolmaýy sebep bolǵan.
Komıssııa sheshimimen kelispegen turǵyn sotqa júgingen. Ol veterınarııalyq stantsııa bergen, maldyń bolǵanyn jáne sý tasqyny kezinde qyrylǵanyn rastaıtyn aktilerdi usynǵan.
Іsti qaraý barysynda sot sol kezeńde qoldanysta bolǵan qaǵıdalarǵa sáıkes, mal aqparattyq júıede tirkelmegen jaǵdaıda da keltirilgen shyǵyndy óteýge ruqsat etilgenin anyqtady. Sonymen qatar komıssııa ótemaqy tóleýden bas tartýǵa jetkilikti quqyqtyq negiz keltirmegen.
Nátıjesinde sot komıssııanyń 10 bas mal úshin ótemaqy tóleýden bas tartý týraly sheshimin zańsyz dep tanyp, kúshin joıdy.
Qostanaı aýdanynyń ákimine sot qorytyndylaryn eskere otyryp, zardap shekken turǵynnyń ótinishin qaıta qaraý mindetteldi. Sot sheshimi ázirge zańdy kúshine engen joq.
Buǵan deıin Atyraýda mal shyǵyny tirkelgen aýdanǵa taǵy 45 tonna jem jetkizilgenin jazdyq.
