Sý tasqynynan qyrylǵan mal shyǵyny 100% óteldi – AShM
ASTANA. KAZINFORM – Elimizdiń birqatar óńirinde tasqyn sýdan qyrylǵan mal shyǵyndary tolyqtaı óteldi. Bul týraly Aýyl sharýashylyǵy vıtse-mınıstri Amanǵalı Berdalın málim etti.
«Jyl basy mal ıeleri úshin aýyr boldy, qalyń qar, tolassyz jaýyn, tasqyn sý. Sý tasqyny bastalǵan sátten bastap mınıstrlik jedel túrde sharalar qabyldady. Atap aıtqanda, sý tasqynyna qarsy is-sharalardy uıymdastyrý jáne saldaryn joıý týraly respýblıkalyq shtab 2024 jylǵy 7 sáýirde tasqyn sýǵa ketken mal shyǵyndaryn óteýdiń algorıtmin bekitti. Algorıtm jergilikti atqarýshy organdarǵa ýaqytyly jetkizildi. Odan bólek, mınıstrlik aýyl sharýashylyǵy salasyndaǵy tabıǵı sıpattaǵy tótenshe jaǵdaı saldarynan jeke jáne zańdy tulǵalarǵa keltirilgen zalaldy óteý qaǵıdalaryn ázirledi», - dedi Amanǵalı Berdalın ortalyq kommýnıkatsııalar qyzmeti alańynda ótken baspasóz máslıhatynda.
Atalǵan algorıtm men qaǵıdattarǵa shyǵyndy bıýdjetten jáne bıýdjetten tys qarajat esebinen óteý kózdelgen.
«Sý tasqyny kezinde 140 myńǵa jýyq mal qaýipsiz jerge kóshirildi. Búginde jergilikti atqarýshy organdardyń jedel derekteri boıynsha respýblıkada 12 450 mal qyrylǵan, barlyq ólekse joıyldy, zalal 100% paıyz óteldi», - deıdi ol.
