Sý tasqynynan qyrylǵan mal ótemaqysyn tóleýdiń algorıtmi ázirlendi
ASTANA. KAZINFORM – Elimizdiń sý basqan aımaqtarynda 1 013 bas mal, sonyń ishinde 133 iri qara jáne 809 bas usaq mal ólekseleri órtelip, joıyldy. Bul týraly Aýyl sharýashylyǵy mınıstrliginiń resmı ókili Oljas Tlebaldın málim etti.
«Sý basqan óńirlerde 60 myńnan astam mal qaýipsiz jerge kóshirildi. Atap aıtqanda, Aqmola oblysynda 18,8 myń bas, Qostanaı oblysy 12,9 myń bas, Aqtóbe jáne Atyraý oblysynda 10 myń bastan joǵary, BQO-da 4,5 myń bas jáne Qaraǵandy oblysynda 1,5 myń bas mal men úı janýarlary qutqaryldy. Jedel aqparatqa sáıkes, sý tasqyny saldarynan respýblıkanyń 7 óńirinde 5711 bas mal óldi, onyń ishinde 1137 iri qara jáne 4051 usaq mal bar», - dedi Oljas Tlebaldın Ortalyq kommýnıkatsııalar qyzmeti alańynda ótken baspasóz máslıhatynda.
Mınıstrlik ókiliniń aıtýynsha, búginde shyǵyn bolǵan mal (úı janýarlary) ólikselerin jınaý jáne joıý jumystary jalǵasyp jatyr.
«Ol úshin 90 birlik tehnıka men qyzmetkerler shtaty jáne ólekselerdi joıý sharalary úshin qajetti dızenfektsııalyq zattar qarastyrylǵan. Búgingi tańda 1013 bas mal, sonyń ishinde 133 iri qara jáne 809 bas usaq mal óleksesi órtelip, joıyldy», - deıdi spıker.
Aıta keteıik, búginde Aýyl sharýashylyǵy mınıstri, vıtse-mınıstrler jáne veterınarııalyq baqylaý jáne qadaǵalaý komıtetiniń basshysy sý basqan aımaqtardy aralap júr.
«Mal ıelerine ótemaqy tóleýge qatysty sáıkes algorıtm ázirlendi, halyqqa jáne zalal anyqtaý jónindegi komıssııanyń nazaryna jetkiziledi. Jalpy, sý tasqynynyń aldyn alý jáne joıý máseleleri, sondaı-aq óńirlerdegi epızootııalyq jaǵdaı mınıstrliktiń turaqty baqylaýynda», - dedi O. Tlebaldın.
Eske sala keteıik, buǵan deıin Qazgıdromet sý basqan óńirlerdegi aýa raıy boljamyn jarııalady. Sondaı-aq elimizdegi sý basqan óńirlerdiń balalary saýyqtyrý ortalyqtaryna jiberilip jatyr.
