Sý tasqynynan keıingi turǵyn úı qurylysyn Sergek arqyly baqylaýǵa bolady
ASTANA. KAZINFORM – QR Ónerkásip jáne qurylys mınıstrliginiń bastamasy boıynsha TsDIAÓM, Sergek Group, «UAT» AQ jáne ákimdiktermen birlesip, sý tasqynynan zardap shekkender úshin jańa turǵyn úıler salý oryndarynda beınekameralar ornatyp, beıne aǵyndaryn Sergek VMS keshendi beınebaqylaý júıesine biriktirý jumystaryn júrgizdi.
«Biz buǵan deıin gov.kz platformasynda sý tasqynyna qarsy is-sharalar ótkiziletin oryndardan translıatsııa shyǵardyq. VMS keshendi júıesiniń kómegimen qazaqstandyqtar zardap shekkender úshin salynyp jatqan turǵyn úı qurylysynyń barysyn baqylaı alady. Qazaqstandyqtardyń ómirin jaqsartý, olardyń qaýipsizdigi men aqparattandyrylýy úshin ázirlegen tehnologııalardy qoldaný - bizdiń áleýmettik jaýapkershiligimiz. Biz el úshin qıyn ýaqytta paıdaly bolǵanymyzǵa qýanyshtymyz. Bizdiń qyzmetkerler óz quzyreti sheginde qajetti kómek kórsetý úshin TJ jedel shtabtarynda jáne sý basqan eldi mekenderde eńbek etýde», - dep Sergek Group bas dırektory Aset Ahmetov bólisti.
Qazirgi ýaqytta Qazaqstannyń alty oblysyndaǵy (Aqmola, Aqtóbe, Batys Qazaqstan, Qostanaı, Soltústik Qazaqstan jáne Atyraý oblystary) qurylys alańdaryna 55 beınekamera ornatyldy. Olardyń onlaın translıatsııasy gov.kz saıtynda táýlik boıy qoljetimdi.
«Ónerkásip jáne qurylys mınıstrligi sý tasqynynan zardap shekken eldi mekenderde turǵyn úıdi qalpyna keltirý jumystaryn baqylaý jáne úılestirý úshin ahýaldyq ortalyq qurdy. Búgingi tańda ahýaldyq ortalyq zalaldy óteý týraly barlyq ótinishtermen jumys istep, ár aýylda, aýdan ortalyǵynda jáne qalalarda qurylys barysyn qatań baqylaýda ustaıdy. Mınıstrlik qyzmetkerleri óńirlerge baryp, qurylys oryndaryn tekserýmenqatar, jergilikti jerlerde máselelerdi sheship, jumys barysyn qadaǵalaýdy qolǵa aldy. Onlaın beınemonıtorıng qurylys pen jóndeý jumystaryn jedel tártippen baqylaýǵa jáne merzimnen artta qalǵan jaǵdaıda tezirek áreket etýge múmkindik beredi. Ashyq jumys formaty biz úshin mańyzdy, biz turǵyndarymyzdy turǵyn úıdi qalpyna keltirý boıynsha júrgizilip jatqan jumystary týraly habardar etkimiz keledi», - dep túsindirdi Ónerkásip jáne qurylys vıtse-mınıstri Jannat Dýbırova.
Esterińizge sala keteıik, Sergek Video Management System (Sergek VMS) – bul qoǵamdyq qaýipsizdikti qamtamasyz etýge nemese bıznesti ońtaılandyrýǵa arnalǵan analıtıkalyq quraldary bar keshendi beınebaqylaý júıesi. Ol qalanyń kósheleri men aýlalarynda, qoǵamdyq oryndarda, bilim berý mekemelerinde, ónerkásiptik nysandarda, sondaı-aq áýejaılarda, vokzaldarda jáne basqa da strategııalyq nysandarda qaýipsizdikti qamtamasyz etýge arnalǵan. Sergek VMS kómegimen ýákiletti qyzmetkerler ártúrli jaǵdaılardy qadaǵalap, ýaqtyly áreket ete alady.
