Sý tasqynynan keltirilgen zalaldy baǵalaý jónindegi komıssııa aqtóbelikterden ótinim qabyldaı bastady

AQTÓBE. KAZINFORM – Memleket basshysynyń tapsyrmasy boıynsha QR Premer-Mınıstriniń orynbasary Serik Jumanǵarın Aqtóbe oblysyna bardy. Bul týraly Úkimettiń baspasóz qyzmeti habarlady.

Oblys ortalyǵynda vıtse-premer Elek ózeniniń jaǵasynda ornalasqan sý basqan «Eko» jáne «Kóktem» baý-baqsha ujymdarynyń turǵyndarymen kezdesti. Jınalǵandardy qyzyqtyrǵan basty másele materıaldyq shyǵynnyń qalaı óteletini boldy. Serik Jumanǵarın adamdardy sý tasqynynan bolǵan barlyq materıaldyq shyǵyn óteletinine sendirdi.

Aqtóbe oblysynyń ákimi Ashat Shaharov óńirde arnaıy komıssııa qurylǵanyn, onyń músheleri zardap shekken turǵyndardyń tıisti ótinishterin qarap jatqanyn aıtty. Oblysta 689 saıajaı úıi sý astynda qalyp otyr.

Sonymen qatar Serik Jumanǵarın Aqtóbe sý qoımasyn tekserdi. Sý tasqyny kezeńinde jobalyq qýaty 245 mln tekshe metr bola tura, sý qoımasyna 485 mln tekshe metr erigen qar sýy jınaldy.

Jedel shtab otyrysynda jumys saparynyń qorytyndylary men ınspektsııa nátıjeleri talqylandy. Sondaı-aq sý tasqynyna qarsy is-qımyl boıynsha naqty sharalar jospary anyqtaldy.