Sý tasqynynan búlingen ınfraqurylymdy qalpyna keltirýge Úkimet rezervinen 48,7 mlrd teńge qarajat qajet
ASTANA. KAZINFORM – Sý tasqynynan búlingen ınfraqurylymdy qalpyna keltirýge Úkimet rezervinen 48,7 mlrd teńge qarajat qajet. Bul týraly Úkimet otyrysynda Premer-Mınıstrdiń orynbasary Qanat Bozymbaev aıtty.
Onyń atap ótýinshe, sý tasqyny saldarynan buzylǵan baspanalardy baǵalaý aıaqtalǵannan keıin zardap shekken turǵyndarǵa 150 AEK mólsherinde joǵalǵan qajetti zattardy satyp alý úshin qosymsha ótemaqy tólenip jatyr. Qazirgi ýaqytta 15 355 otbasy 7,6 mlrd teńge kóleminde ótemaqy aldy. Mal shyǵyny úshin memlekettik kómek kólemi 2,8 mlrd teńgeden asty.
«Zardap shekken bızneske keltirilgen zalaldy óteý boıynsha jumystar bastaldy. Qazirgi ýaqytta óńirlik komıssııalar shaǵyn jáne orta bıznes sýbektileriniń jalpy somasy 833 mln teńgege 124 ótinimin qarady jáne maquldady. Jalpy, aldyn ala baǵalaýy boıynsha 24,1 mlrd teńge somasyna 797 ShOB sýbektisi zardap shekti. Osy obektiler boıynsha baǵalaý jáne smetalyq jumystar júrgizilip jatyr. Olardyń qorytyndysy óńirlik komıssııalardyń qaraýyna shyǵarylatyn bolady», - dedi ol.
Qanat Bozymbaevtyń atap ótýinshe, ákimdikterdiń ótinimderine sáıkes aldyn ala baǵalaý boıynsha ınfraqurylymdy qalpyna keltirý úshin Úkimet rezervinen 48,7 mlrd teńge qarajat qajet.
«Bul qarajat avtomobıl joldaryn, elektrmen jabdyqtaý jelilerin qalpyna keltirýge jáne áleýmettik nysandardy jóndeýge baǵyttalatyn bolady. Búgingi kúni 39,8 mlrd teńgege jobalar daıyndalyp, qujattama Qarjy mınıstrligine usynyldy», - dedi ol.
