16:31, 24 Sáýir 2024 | GMT +6
Sý tasqynynan bas saýǵalaǵan 31 938 adam úıine oraldy
ASTANA. KAZINFORM – Tótenshe jaǵdaılar mınıstrliginiń resmı ókili Asqar Shárip Jaıyqtyń jaǵasyn bekemdeý jumystary áli aıaqtalmaǵanyn málim etti.
«Qazirgi tańda respýblıka boıynsha 31 938 adam óz úılerine oraldy. 5682 turǵyn úı men 2584 aýladan sý burylyp, sorǵytyldy. Jedel jeli telefony arqyly 2213 qońyraý tústi. Batys Qazaqstan jáne Atyraý oblystarynda Jaıyq ózeni jaǵasyn bekemdeý jumystary áli júrip jatyr», - dedi ol ortalyq kommýnıkatsııalar qyzmetinde ótken brıfıngide.
Qazir tasqynmen kúreste 32 myńnan astam adam jumys istep júr.
«Avarııalyq qutqarý jáne tasqyn saldaryn joıý jumystaryna 32 myńnan astam adam, 4 myńǵa jýyq tehnıka, 763 sý soratyn qurylǵy, 293 júzý quraly, 13 áýe kemesi jumyldyrylǵan», - dedi TJM ókili.
