Sý tasqynynan aman shyǵýymyz el birliginiń arqasy dep bilemin – polıtsııa qyzmetkeri

ORAL. KAZINFORM – Sý tasqynymen kúreske belsene qatysyp, memlekettik marapat alǵandardyń biri, Oral qalasy polıtsııa basqarmasy patrýldik polıtsııa batalony saptyq bólinisiniń qyzmet aǵa ınspektory, polıtsııa kapıtany Baqytjan Satybaldın Kazinform tilshisiniń saýaldaryna jaýap berdi.

- Memleket basshysynyń qolynan alǵan «Erligi úshin» medalińiz qutty bolsyn! Polıtsııa qyzmetine qalaı keldińiz, bala kúnnen armandadyńyz ba? Aldymen sol jóninde aıtyp ótseńiz?

– Iá, bala kúnimnen armandadym desem bolady. Aqjaıyq aýdany Taıpaq aýylynda týyp-ósip, Krasnoıar orta mektebin bitirgennen keıin áskerı boryshymdy ótedim. Sodan soń júrek qalaýymen jol polıtsııasyna keldim. 2011 jyldyń mamyr aıynan beri ishki ister organdarynda qyzmet atqaryp kelemin.

- Óz qyzmetińizdiń qıyndyǵy nede dep oılaısyz?

- Árbir jumystyń qıyndyǵy bolady ǵoı. Basqa salamen salystyrǵanda, pálendeı aıyrmashylyǵy joq dep oılaımyn. Bir ereksheligi, jeke ómirimizge ýaqyttyń az qalatyny bolar. Halyqpen jumys istegennen keıin kim-kimmen de durys sóılese bilý mańyzdy. Psıhologııalyq jaǵynan árkim ár túrli qabyldaıdy ǵoı, sol kezde durys sheshimin taba bilý kerek. Osy qyzmetke ábden úırenip ketkendikten bolar, ereksheligin tap sezinip te jatqan joqpyz.

- Bıylǵy sý tasqyny elge ońaı soqpaǵany belgili. Alǵy shepte polıtsııa qyzmetkerleri de júrdi. Eki jasóspirim qyzdy qalaı qutqaryp qaldyńyz?

- Bul 21 sáýir kúngi bolǵan oqıǵa edi. Qyzmet babynda úsh kvadrotsıklmen júrdik. Saıajaılardy tótennen sý basqan kezde barlyq aýyr tehnıkalar qarsy shyǵyp jatty. «KamAZ» júrgizýshileriniń biri toqtap, saıajaı úıinde eki qyzdyń qalyp qoıǵanyn eskertti. Joldy sý shaıyp ketken. Bergi bette turǵandardyń biri – áıel adam «Qyzdar qalyp qoıǵan úıdi bilemin», dep jol kórsetti. Barsaq, kámeletke tolmaǵan eki qyz uıyqtap jatyr eken. Oıatyp, qujattaryn alyp, keri shyqtyq.

- Prezıdent qolynan marapat alǵan kezde qandaı kóńil kúıde boldyńyz?

- Árıne, erekshe sezim qushaǵynda boldym. Ony tipti sózben aıtyp jetkizý qıyn. Marapat alamyz dep múlde oılaǵan emespiz. Úsh uıyqtasa, túsimizge enbegen jaıt qoı. Sý tasqyny kezinde erligimen, eńbegimen kózge túskender az bolǵan joq. Prezıdentimizdiń ózi de olardyń qatarynda kásipkerler, eriktiler, ózge eldiń azamattary bolǵandyǵyn atap kórsetti. Sý tasqynynan aman shyǵýymyz el birliginiń arqasy dep bilemin. Sondyqtan halqymyz aman bolsyn!

- Aldaǵy arman-maqsattaryńyz qandaı?

- Óz qyzmetimdi barynsha adal atqaryp, eldiń, áriptesterimniń senimin aqtaı bilsem, odan artyq abyroı joq.

Eske sala keteıik, budan buryn Ulttyq ulan jaýyngeriniń memlekettik marapat jaýapkershilikti eseleı túsetini týraly aıtqanyn jazǵan bolatynbyz.