Sý tasqynynan 9761 bas mal qyryldy – mınıstr

ASTANA. KAZINFORM – Sý basqan óńirlerde mal shyǵyny ótele bastady. 

«Mal shyǵyny men tólemaqyǵa qatysty túrli aqparat tarap jatyr. Ár óńirde jedel shtab qurylǵan, olar jumys isteýde. Tasqyn sý aýmaǵynan 138 800 bas mal qutqaryldy. Odan bólek, 9 761 bas mal qyryldy, ólekselerdiń 98%-y joıyldy. Qyrylǵan mal shyǵynyn óteýdiń algorıtmi bar, qujaty bar mal shyǵyny bıýdjet esebinen óteledi. Al qujaty joq, tirkelmegen mal shyǵyndary qordyń, demeýshilerdiń esebinen óteledi. Búginde 4 801 bas mal shyǵyny óteldi, bul baǵyttaǵy jumys jalǵasyp jatyr», - dedi Aýyl sharýashylyǵy mınıstri Aıdar Saparov Úkimet otyrysynan keıin ótken brıfıngide. 

Mınıstrdiń málimetinshe, 4 801 bas mal shyǵynyn óteýge 1 mlrd 198 mln teńge bólingen. 

Buǵan deıin sý tasqyny eldi mekenderge kóp qoqys ákelgenin, saldarynan órt shyǵý qaýpi artqanyn jazǵan edik.