Sý tasqynyna jol bergen eshbir laýazymdy tulǵa jaýapqa tartylmaǵan — depýtat

ASTANA. KAZINFORM — Májilis depýtaty Abzal Quspan elimizdegi sý tasqynynyń sebep-saldaryna qatysty máseleni kóterip, elimizdiń bas prokýrory Berik Asylovqa depýtattyq saýal joldady.

«Bıylǵy sý tasqyny — elimiz táýelsizdik alǵaly bolǵan onynshy iri sý apaty. Alaıda osy kezge de deıin sý tasqynynyń aldyn almaǵany nemese salǵyrttyq tanytyp, jol bergeni úshin eshbir joǵary laýazymdy tulǵa jaýapkershilikke tartylmaǵan. Bul jerde men jergilikti atqarýshy organnyń, ıaǵnı ákimderdiń jaýapkershiligi týraly aıtyp otyrmyn. Ózen boıyndaǵy sý jaıylmalarynan jer bergen, saıajaılardy turǵyn úıge aınaldyrǵan, ıaǵnı jaryq, gaz tartyp, azamattardy turaqty tirkeýge ruqsat bergen, ol — Úkimet emes, jergilikti atqarýshy organ, ıaǵnı ákimdikter», — dedi Abzal Quspan Májilistiń jalpy otyrysynda. 

Onyń aıtýynsha, kelgen shyǵyn salmaǵyn únemi memleket moınyna alady. 

«Qylmystyq kodekstiń 3 babynda asa iri zalal jáne aýyr zardap degen uǵym bar, bıyl sý tasqynynda memleket te, azamattar da asa iri kólemde shyǵynǵa uryndy. Prezıdent sý tasqynyna baılanysty Bas prokýratýraǵa naqty tapsyrma berdi. Osy oraıda bir top depýtat bolyp BQO jáne Atyraý oblysynyń Qulsary qalasyndaǵy jaǵdaıǵa kóz jetkizip keldik. Atalǵan óńirdegi jaǵdaılarǵa qatysty tekserýdi Bas prokýratýra deńgeıinde keshendi túrde uıymdastyrý qajet dep esepteımin», — deıdi ol. 

Sondaı-aq, halyq qalaýlysy qolynda dáleldeýshi faktilerdiń baryn aıtty. 

«Qulsaryda jergilikti belsendiler, oblystyq, aýdandyq máslıhat depýtattary Jem ózeni boıyndaǵy zańsyz salynǵan bógetter týraly máseleni byltyr kótergen. Biraq jergilikti organdar men prokýratýra tarapynan eshqandaı qoldaý taba almaǵan, sol sebepti olarǵa senbeıdi. Barlyq tıisti qujattar, faktiler meniń qolymda bar», — dedi A. Quspan.