Sý tasqynyna daıyndyq: Japonııa mamandary Qazaqstannyń sý qoımalaryn tekserdi
ASTANA. KAZINFORM – Sý resýrstary jáne ırrıgatsııa mınıstrligi kóktemgi tasqyn kezeńine daıyndyq aıasynda kórshiles eldermen ózara is-qımyldy arttyrdy.
− Sý dıplomatııasy sý tasqyny kezinde de, sýarý maýsymy kezinde de mańyzdy. Qazir ol joǵary deńgeıde dep aıta alamyz jáne kórshi eldermen kelissózder boıynsha qıyndyqtar joq. Sý tasqyny kezeńin ótkizý boıynsha ózara is-qımyl jónindegi Qazaqstan-Reseı birlesken jumys toby quryldy. Qazir jumys tobynyń quramy, erejesi jáne 2025 jylǵa arnalǵan jumys jospary bekitildi. ıAǵnı, Qazaqstan men Reseı sý tasqyny kezeńinde aqparat almasýǵa kelisti, - dedi mınıstrliktiń resmı ókili Móldir Ábdýálıeva Ortalyq kommýnıkatsııalar qyzmetinde ótken brıfıngte.
Qytaımen de sý tasqyny kezindegi jumys ekijaqty kelisim arqyly júzege asady. Transshekaralyq ózenderde sý tasqyny sekildi tabıǵı apattar týyndaǵan jaǵdaıda taraptardy shuǵyl habardar etý jóninde kelisim bar.
Qyrǵyzstanmen júrgizilgen kelissózder barysynda Talas ózeni arqyly sý berý kólemin ulǵaıtý týraly kelisim ornady. Bul Kırov sý qoımasynan sý jiberýdi retteý jáne sý tasqyny kezeńinde apattyń aldyn alý úshin jasalady.
− Oǵan qosa, shet memlekettermen tájirıbe almasý belsendi júrip jatyr. Japonııa Halyqaralyq yntymaqtastyq agenttiginiń mamandary Qazaqstannyń 4 oblysyndaǵy 13 gıdrotehnıkalyq qurylysty tekserdi. Sarapshylar sý tasqyny kezinde óte úlken kólemde sý qabyldaǵan Aqmola, Qaraǵandy, Aqtóbe jáne Batys Qazaqstan oblystaryndaǵy nysandardy zerttedi. Al nıderlandylyq mamandar Astana men Aqtóbede sý tasqyny táýekelderin basqarý boıynsha semınarlar ótkizdi, - dep tolyqtyrdy M. Ábdýálıeva.
Elimizdiń barlyq sý qoımalary sý tasqyny kezeńine daıyndalýda.