Sý tasqynyna daıyndyq: Qostanaı oblysynyń sý qoımalaryna áli 461 mln tekshe metr sý syıady
ASTANA. KAZINFORM - Kóktemgi sý tasqyny kezeńine daıyndyq aıasynda Qostanaı oblysyndaǵy «Qazsýshar» fılıaly Joǵarǵy Tobyl jáne Qaratomar sý qoımalarynda bos syıymdylyq daıyndaý jumystaryn júrgizdi. Bul sý qoımalary kóktemgi sý tasqyny kezinde tolyǵady.
QR Sý resýrstary jáne ırıgatsııa mınıstrligi baspasóz qyzmetiniń habarlaýynsha, qazirgi tańda sý qoımalaryndaǵy jalpy bos syıymdylyq 461 mln tekshe metrdi quraıdy. Bul jobalyq kólemniń 33 paıyzyna teń. Al boljanyp otyrǵan sý kólemi 459 mln tekshe metrge deıin jetýi múmkin. Atap aıtqanda, Joǵarǵy Tobyl sý qoımasy 70%-ǵa, al Qaratomar sý qoımasy 63%-ǵa tolǵan.
Kóktemgi sý tasqynyn qaýipsiz ótkizý jáne gıdrotehnıkalyq nysandardyń turaqty jumysyn qamtamasyz etý maqsatynda arnaıy komıssııa qurylyp, is-qımyl jospary bekitildi. Qostanaı fılıaly nysandarynda kireberis joldar men aýmaqtardy qardan tazartý jumystary turaqty túrde júrgizilip jatyr.
-Qajetti ınertti materıaldar men janar-jaǵarmaı qory daıyndaldy. Sý tasqyny kezeńine 36 tehnıka ázirlendi. Olardyń qatarynda ekskavatorlar, býldozerler, tıegishter, traktorlar, avtokólikter, motorly qaıyqtar, katerler jáne basqa da tehnıka bar. Sonymen qatar Reseı Federatsııasynyń Chelıabi jáne Qorǵan oblystarynyń sý qyzmetterimen, «Qazgıdrometpen», Qostanaı oblysynyń Tótenshe jaǵdaılar departamentimen jáne jergilikti atqarýshy organdarmen turaqty túrde aqparat almasylyp otyr. 2026 jylǵy sý tasqyny kezeńine daıyndyqty úılestirý boıynsha oblystyq jedel shtabpen keńester ótkizilip jatyr, – dedi «Qazsýshardyń» Qostanaı fılıalynyń dırektory Muhtar Jumanov.
Aıta keteıik, osyǵan deıin Aqmola oblysynyń sý tasqynyna daıyndyǵy týraly jazdyq.
