Sý tasqynyna daıyndyq: BQO ózenderinde jarý jumystary júrgiziletin bolady

ORAL. KAZINFORM — Batys Qazaqstan oblysynda aldaǵy kóktemgi sý tasqynyna daıyndyq jumystary barysynda ózenderde jarý jumystary júrgiziletin bolady.

BQO TJD tótenshe jaǵdaılardy joıý basqarmasynyń bastyǵy Nuraly Músıevtiń málim etkenindeı, 229,7 mln teńge somasyna 84 myń sharshy metr (96 ýchaske) alańda jarý jumystary júrgizý úshin baıqaý jarııalandy.

Nuraly Qajmuqanulynyń sózine qaraǵanda, baıqaý qorytyndysy búgin shyǵady.

«Oblys boıynsha kóktemgi sý tasqyny kezinde jumyldyrýǵa 4126 adam, 1817 tehnıka, 123 júzý quraly, 455 motopompa bekitildi. 2162 tonna ınertti materıal, 510 400 dana qapshyq daıyn. Kúni búgin aýdandarda 25 460 dana qapshyq qaptaldy», deıdi N.Músıev.

Onyń aıtýynsha, qosymsha gýmanıtarlyq kómek esebinen ákimdikterge 177 qaıyq, 23 motor, 35 generator, 46 motopompa, 10 palatka, 182 qutqarý keýdeshesi, 1 448 etik, 140 kombınezon berildi.

«Halyqty evakýatsııalaý jaǵdaıynda 47 753 orynǵa 219 ýaqytsha ornalastyrý pýnkti daıyndaldy, tósek-oryn sany - 6726. Oǵan qosa ótken sý tasqyny kezeńinde 15 000 dana tósek oryn memlekettik materıaldyq rezervten bronnan shyǵaryldy. Jalpy memlekettik materıaldyq rezervten materıaldyq qundylyqtardyń 36 ataýy bronnan shyǵarylyp, oblysymyzǵa berildi. TJ departamentine 2024 jyldyń ótken kezeńinde jalpy somasy 902 mln 803,02 myń teńgege 13 tehnıka jáne qural-jabdyqtar satyp alyndy», dedi N.Músıev.

Eske sala keteıik, budan buryn Oralda tasqyn sý basýy múmkin saıajaılardaǵy 350 otbasyǵa habarlama berilgenin jazǵan bolatynbyz.