Sý tasqynyna daıyndyq: BQO-nyń birqatar aýdanynda tehnıkalar sany sáıkes kelmeı otyr

ORAL. KAZINFORM – Kóktemgi sý tasqynyna daıyndyq barysynda Oral qalasy jáne aýdandardyń kúsh-quraldary tekserildi.

Tekseris barysynda tehnıkalardyń, motopompalardyń jáne júzý quraldarynyń jumysqa jaramdylyǵy, ınertti materıaldar men janarmaı qorynyń jetkiliktiligi, qapshyq qaptaý jumystary basa nazarǵa alyndy.

Bul týraly BQO TJD bastyǵynyń orynbasary Eldos Battalov oblys ákimi Narıman Tóreǵalıevtiń tóraǵalyǵymen ótkizilgen tótenshe jaǵdaılardyń aldyn alý jáne olardy joıý jónindegi oblystyq komıssııanyń otyrysynda málim etti.

Onyń sózine qaraǵanda, oblys boıynsha birqatar aýdan aldyn ala berilgen aqparattarynan bólek, nıetsharttar jasasý arqyly sý sorý jáne ınjenerlik tehnıkalar sanyn kóbeıtken.

Sonymen qatar tekseris barysynda kerisinshe tehnıka jáne ınertti materıal men qapshyq qorlarynyń aldyna ala berilgen aqparatqa sáıkes kelmeıtini anyqtalǵan.

- Atap aıtqanda, sý sorý tehnıkalary Syrym (3), Shyńǵyrlaý (5), Kaztalov (6), Qaratóbe (6), Tasqala (6), Jańaqala (10) aýdandarynda, evakýatsııalyq tehnıka Qaratóbe (6), Syrymda (7), ınjenerlik tehnıka Shyńǵyrlaý (5), Jańaqala (5), Aqjaıyq (6), Terekti (6), Qaratóbede (9), júk kóligi Aqjaıyq (2), Terekti (3), Shyńǵyrlaý (3), Jańaqala (5), Qaratóbede (6), ınertti materıaldar Qaratóbe (11 tonna), Jánibek (20), Jańaqala (60), Tasqalada (70) jáne Oral qalasynda (70 tonna) tómen deńgeıde. Eki jyl burynǵy sý tasqyny kezinde sý basý derekteri oryn alǵan Syrym aýdany Buldyrty aýylyndaǵy 4 motopompa isten shyqqan, - dedi E.Battalov.

Onyń aıtýynsha, aýdandarda jalpy sany 358 420 dana qapshyq daıyndalsa, sonyń 67 820-sy qaptalǵan. Qapshyq qaptaý jumystary Jánibek (500), Jańaqala (650), Báıterek (1 200) aýdandarynda tómen deńgeıde jáne jylýmen qamtamasyz etilmegen ǵımarattarda saqtalýda. Bul – qapshyq sapasynyń tez tómendeýine ákelip soǵatyn birden-bir faktor.

Sondaı-aq Báıterek, Jańaqala, Jánibek, Syrym aýdandarynda qapshyq qaptaý jumystary tek aýdan ortalyqtarynda ǵana júrgiziledi. Kúni búgin aýdandardyń kópshiliginde kúshter men quraldar tek aýdan ortalyqtarynda shoǵyrlanǵan. Al sý basý qaýpi bar eldi mekenderde tek sol aýyldardaǵy sharýa qojalyqtarynyń traktorlarymen shektelgen.

- Kúsh-quraldardan basqa qarajat bólýdi qajet etetin máseleler bar. Qazirgi ýaqytta aýmaqtyń qumdy bolýyna baılanysty Qaldyǵaıty ózeni arnasy jyl saıyn ózgerip keledi. Osyǵan oraı Qaratóbe aýdanynyń ortalyǵyna qaýip tónip tur. Sondyqtan Qaldyǵaıty ózeni jaǵalaýyn nyǵaıtý jumystaryn júrgize otyryp, kópir qurylysyn jedel qarjylandyrý qajet. Jyl saıyn Shyńǵyrlaý aýdanynyń ortalyǵynda turǵyn úıler sý basý qaýpine ushyraıdy. Kúni búgin aryq júıesin ornatý boıynsha joba ázirlendi. Atalǵan is-sharalardy júzege asyrý úshin 250 mln teńge mólsherinde oblystyq bıýdjettiń qoldaýy qajet. 2024 jyly shaıylǵan Uzynkól sý qoımasynyń bógeti otyryp, jaryqtar paıda bolp jatyr, - dep qosty E.Battalov.

Oblys ákimi N.Tóreǵalıev tehnıka jetispeıtin aýdandarda qosymsha kelisimshart nemese nıetshart jasasý týraly departament basshylyǵynyń usynysyn qoldady. Sondaı-aq qapshyq qaptaý jumystary aýdan ortalyǵynda ǵana emes, sý basý qaýpi bar eldi mekenderde de tııanaqty atqarylýyn talap etti.

Aımaq basshysy sý tasqyny kezeńinde qaýipti ýchaskelerde táýlik boıy kezekshilik uıymdastyrý, ınertti materıaldar men qajetti tehnıkalardy aldyn ala jetkizý jóninde naqty tapsyrmalar berdi.

Eske sala keteıik, budan buryn Batys Qazaqstanda sý tasqynynan keler qaýip qandaı ekendigin jazǵan bolatynbyz.