Sý tasqynyna daıyndyq: Batys Qazaqstanda birneshe ózenniń arnasy keńeıtildi
ORAL. KAZINFORM — Batys Qazaqstan oblysynda sý basý qaýpi bar 185 eldi meken esepke alynǵan.
BQO TJD tótenshe jaǵdaılardyń aldyn alý basqarmasy bastyǵynyń mindetin ýaqytsha atqarýshy Ismaıl Azamattyń Kazinform tilshisine málim etkenindeı, bıyl ınjenerlik jumystar jospary boıynsha 35 is-shara kózdelse, sonyń 19-y máresine jetken.
Onyń sózine qaraǵanda, qalǵan 16 is-shara boıynsha jumystar jalǵastyrylyp jatyr.
- Jalpy, osy jyly júrgizilgen is-sharalar aıasynda 12 km qorǵanys bógetteri salyndy. Sondaı-aq 0,6 km kanal keńeıtilip, 1,3 km aryq júıesi qazyldy. Jaqsybaı, Qaldyǵaıty, Qaıyńdy jáne Óleńti ózenderiniń arnalary keńeıtildi. Aýdandyq mańyzy bar avtojoldarda 21 sý ótkizý qubyry ornatylyp jatyr. Budan bólek, 2025 jyly Báıterek aýdany Chırov aýylyndaǵy sý qoımasyn jóndeý jumystary aıaqtaldy. Oral qalasynda Jaıyq ózeniniń jaǵalaýyn nyǵaıtý jumystary júrgizilýde. Jaıyq, Shaǵan jáne Derkól ózenderinde sý deńgeıin baqylaýdy kúsheıtý úshin avtomattandyrylǵan 3 gıdrobeket ornatyldy. Atalǵan gıdrobeketter avtomatty túrde táýlik boıy aqparat berip otyrady, - deıdi I.Azamat.
Onyń aıtýynsha, jergilikti atqarýshy organdardyń teńgerimine 22 ınjenerlik tehnıka, 5 motopompa, 16 sırenalyq-sóıleý qurylǵysy men muz keskish satyp alyndy. Satyp alý jumystary júrip jatyr.
- Qazirgi ýaqytta oblystaǵy barlyq ınjenerlik tehnıkalarǵa tekserý júrgizip jatyrmyz. Tekserý aıaqtalǵan soń qajetti tehnıkalar boıynsha kelisim-shart jasaqtaıtyn bolamyz. Muz jarý qajet oryndardyń barlyǵy anyqtaldy, jeltoqsan aıynan bastap baıqaý jarııalaýdy josparlap otyrmyz. Qajetti qaptar men ınertti materıaldar qory ázirlengen, - dedi I.Azamat.
Oral qalasy ákimdiginen túsken málimetke qaraǵanda, 150 shaqyrymnan astam aryq júıesi bar. Bıyl turǵyn úı alaptaryn erigen qar, jańbyr sýynyń basýyn aldyn alý maqsatynda qalada jalpy uzyndyǵy 3 kılometrden astam aryq júıesi salyndy.
Kúni búgin qala aýmaǵyndaǵy jol jıegindegi aryqtardy jáne jol sýaǵarlaryn tazalaý jumystary júrgizilip jatyr.
Oral qalasy aýmaǵynda yqtımal sý tasqynynan qorǵaý maqsatynda bógetter nyǵaıtyldy. Bógetterdiń jalpy sany - 12, onyń uzyndyǵy - 11,4 km.
Sý tasqynymen kúreske Oral qalasy aýmaǵyndaǵy kommýnaldyq mekemelerdiń 400-deı tehnıkasy daıyn. Onyń ishinde 30 sý sorǵysh, 40 ınjenerlik tehnıka, 150 júk kóligi, 50 jeńil kólik, 72 traktor, 30 motopompa jáne adamdardy evakýatsııalaýǵa arnalǵan 30 tehnıka bar. Oǵan qosa qala aýmaǵyndaǵy qurylys jáne jol salý salasyndaǵy kompanııalardyń tehnıkalary túgendelip jatyr. Sondaı-aq qaladaǵy jeke jáne zańdy tulǵalardyń tehnıkalaryn tartýǵa 6 kelisim-shart (100 tehnıka) jasaldy.
Ákimdik málimeti boıynsha Oral qalasynda tótenshe jaǵdaı bolǵan jaǵdaıda zardap shekken turǵyndardy ornalastyrý úshin 16 evakýatsııalyq pýnktte 4 myń adamǵa arnalǵan oryn bar, 2 myń kerýert, 2 myń tósek-oryn daıyn. Qajettilikke baılanysty matras jáne basqa da qajetti tósek-oryndarmen qosymsha jabdyqtalady.
Tótenshe jaǵdaılar kezinde aýyl sharýashylyǵy janýarlaryn ýaqytsha ustaý oryndarymen jáne jem-shóppen qamtamasyz etý jónindegi qyzmetterdi oryndaýǵa jeke kásipkerlik jáne sharýa qojalyqtarymen kelissózder júrgizilip, nıetshart jasaldy. Memorandým-kelisim negizinde «Oral aýyl sharýashylyǵy tájirıbe stantsııasy» JShS-men qajet bolǵan jaǵdaıda óziniń aýyl sharýashylyǵy tehnıkasyn paıdalaný arqyly qalanyń eldi mekenderi men sharýa qojalyqtaryna mal azyǵyn jetkizý jumysy uıymdastyrylady. Sonymen qatar aýyl sharýashylyǵy muqtajdyqtary úshin atalǵan seriktestiktiń saqtaý oryndary men qoımalary paıdalanylady.
- Sý tasqyny oryn alǵan jaǵdaıda sol aýmaqtaǵy jaqyn jerde ornalasqan aıaldamalar jáne saýda úıleriniń aýmaǵy turǵyndardy evakýatsııalaý oryndary bolyp belgilendi. Kóshiriletin turǵyndardy tasymaldaý, ystyq tamaq pen birinshi qajetti kerek taýarlarmen qamtamasyz etý úshin bıznes sýbektilerimen 31 nıetshart jasaldy. Oral qalasy boıynsha sý tasqyny kezinde jol qatynasynsyz qalatyn eldi mekender joq, - dep habarlady Oral qalasy ákimdiginen.
Eske sala keteıik, budan buryn kóktemgi sý tasqynyna daıyndyq barysynda Oral qalasy men Qaratóbe aýdany ákimine sógis jarııalanǵanyn jazǵan edik.
Sondaı-aq Oralda Jaıyq ózeni jaǵasyndaǵy úıler turǵyndary kóshiriletini habarlandy.