Sý tasqynyna daıyndyq aıasynda ózen arnalary tazartylyp jatyr
ASTANA. KAZINFORM – Kóktemgi sý tasqynyna daıyndyq aıasynda ózen arnalarynyń shamamen 110 shaqyrym bóligi tazartylyp jatyr.
2026 jylǵy kóktemgi sý tasqyny kezeńine daıyndyq aıasynda Qazaqstannyń alty oblysynda ózen arnalarynyń jalpy uzyndyǵy 109,5 shaqyrym bolatyn ýchaskesinde qalpyna keltirý jumystary (tazalaý jáne tereńdetý) júrgizilip jatyr.
Qazirgi tańda Abaı, Aqmola, Qostanaı, Atyraý, Qaraǵandy jáne Soltústik Qazaqstan oblystaryndaǵy toǵyz ózenniń 83,7 shaqyrym aýmaǵynda jumystar tolyq aıaqtaldy.
Al qys mezgiline baılanysty Aqmola jáne Qaraǵandy oblystaryndaǵy úsh ózenniń 25,8 shaqyrym ýchaskesinde tazalaý jumystary ýaqytsha toqtatylǵan. Barlyq jumysty kóktemgi tasqyn bastalǵanǵa deıin tolyq aıaqtaý josparlanyp otyr.
— Jumystar Sý resýrstary jáne ırrıgatsııa mınıstrligi jergilikti atqarýshy organdarmen birlesip ázirlegen 2025-2027 jyldarǵa arnalǵan eldi mekender mańyndaǵy ózen ýchaskelerin sanatsııalaý jónindegi Jol kartasyna sáıkes júrgizilip jatyr. Qalpyna keltirý jumystary tasqyn sýdyń qaýipsiz ótýin qamtamasyz etip, eldi mekenderdi sý basý qaýpin boldyrmaýǵa múmkindik beredi, — dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Aıta ketelik Aqtóbede kóktemgi sý tasqynyna daıyndyq júrip jatqany týraly jazǵan edik.