«Sý tasqynyna daıyn bolýdy suraımyz»: Oral turǵyndaryna eskertý jarııalandy

ORAL. KAZINFORM — Oral qalasy tusynda ózenderde sý deńgeıi kóterilýi yqtımal.

Oral qalasy ákimdiginen alynǵan aqparatqa qaraǵanda, «Qazsýshar» RMK BQO fılıalynyń málimetine sáıkes jaqyn kúnderi Shaǵan, Derkól, Jaıyq ózenderinde sý deńgeıi kóterilip, qaýipti shekten asýy múmkin.

Saldarynan ózen jaıylmalarynda ornalasqan baý-baqsha seriktestikteri, ondaǵy turǵynjaılar zardap shegýi múmkin.

«Turǵyndardan sý tasqynyna daıyn bolýdy, qajetti is-sharalardy qolǵa alýdy, sý tasqynyna deıin aldyn ala qaýipsiz jerge kóshýdi suraımyz. Sý tasqyny qaýpi týraly aldyn ala habarlanǵan kezde radıo, teledıdar, ınternettegi aqparatty qadaǵalańyz. Gaz, elektr qýatyn jáne sýdy aıyryp, qujattardy sý ótkizbeıtin paketke salyńyz. Aqshany, kıim, tamaq jáne dári-dármekti daıyndap, baǵaly zattar men jıhazdardy sýdan qaýipsiz jerlerge ornalastyryńyz. Úı janýarlaryn jipten bosatyńyz jáne olardy qaýipsiz jerge aparyńyz. Eger sý tasqyny oryn alsa, dári-dármek, azyq-túlik, sý qoryn jáne alǵashqy kómek jınaǵyn alyńyz. Sý tasqyny aımaǵynan shyǵyp, evakýatsııalyq orynǵa baryńyz. Múmkindik bolsa, sýda qalǵan adamdarǵa shuǵyl túrde kómektesińiz. Eger evakýatsııalaý múmkin bolmasa, 101 nemese 112 nómirine qońyraý shalyńyz jáne ornalasqan jerińiz týraly habarlańyz. Múmkindiginshe tezirek jaqyn mańdaǵy qaýipsiz bıik orynǵa (joǵarǵy qabattar, shatyr) ornalasyńyz. Kómek kelgenge deıin úıde bolyńyz, belgi berińiz (kúndiz – aq nemese túrli-tústi materıalmen, túnde – fonarmen)», - delingen resmı habarlamada.

Eske sala keteıik, budan buryn Batys Qazaqstan oblysynda 430-dan astam úıge sý kirgenin jazǵan bolatynbyz.

Sondaı-aq Batys Qazaqstan oblysynda 18 joldy tasqyn sý shaıyp ketti.