Sý tasqynyna baılanysty Pavlodardyń bir aýylynda tótenshe jaǵdaı jarııalandy

PAVLODAR. KAZINFORM - Jalaýly aýylynda 14 úıdi sý basqan. Mamandardyń aıtýynsha, oblys boıynsha qarǵyn sý birtindep soltústik bólikke qaraı jyljyp barady.

Aqtoǵaı aýdany ákiminiń orynbasary Ermek Mashryqov Jalaýly eldi mekeninde jalpy sany 14 úı sý astynda qalyp qoıǵanyn jetkizdi. Jaǵdaıdyń kúrdelenýine baılanysty atalǵan aýylda jergilikti aýqymdaǵy tabıǵı sıpattaǵy tótenshe jaǵdaı jarııalandy.

- Jalaýly aýyly oıpań jerde ornalasqandyqtan, jaǵdaı kúrdeli bolyp tur. Aýylǵa erigen qar sýy áli de kirip jatyr. Sý sorý jumystary úzdiksiz júrgizilýde. 14 úıdiń turǵyndaryna kómektesip, olardy ýaqytsha týystarynyń úılerine ornalastyrdyq. Maldary qurǵaq jerge aıdap shyǵaryldy. Arnaıy komıssııa azamattardyń baspanalaryn tekserýge shyqty, keltirilgen zalaldy baǵalaıtyn bolady, - deıdi ol.

Pavlodar oblysy ákiminiń baspasóz qyzmetinen habarlaǵandaı, qazirgi sátte Aqsý qalasynda, Aqtoǵaı, Ýspen, Ertis, Sharbaqty jáne Tereńkól aýdandarynda qarǵyn sý boıynsha 10 ýchaske baqylaýda tur. Qyzyl sý júre bastaǵaly jáne ótken apta sońynda jaýǵan nóser jańbyrdyń saldarynan 18 turǵyn úıdi sý basqan. Qazirgi ýaqytta 8 úıden sý shyǵaryldy, al Aqtoǵaı jáne Ýspen aýdandarynda 10 úı boıynsha sýdy jyrý, sorý jumystary jalǵasyp jatyr.

«Búgin arnaıy komıssııa barlyq sý basqan úılerge keltirilgen zalaldy baǵalaý jumystaryna kiristi. Komıssııa jumysynyń qorytyndysy boıynsha barlyq zardap shekkenderge oblys bıýdjetiniń rezervinen jáne bıýdjetten tys qarajat esebinen kómek kórsetiletin bolady», - dep málimdedi baspasóz qyzmetinen.

Óńirlik tótenshe jaǵdaılar departamenti bastyǵynyń orynbasary Oleg Treşevtiń aıtýynsha, qarǵyn sý qazirgi ýaqytta oblystyń ońtústik aımaqtaryna qaraı oıysa túsken. Sońǵy kúnderi topyraqtaǵy tońnyń beti jipsip, sý jaqsy sińe bastaǵan. Áıtse de, soltústiktegi, Reseı Federatsııasymen shekaralas aýyldarǵa qaýip tónýi múmkin. Bul óńirlerde qar áli tolyq erı qoımaǵan. Eldi mekenderden qar shyǵarylyp, aryqtar qazylyp jatyr.

«Aqmola oblysyndaǵy sý qoımalarynan sý bosatylyp jatyr. Jiberilip jatqan sý normadaǵydan artyq, soǵan oraı oblysta taǵy qosymsha ýchaskelerdi sý basýy yqtımal. Deıturǵanmen bizdiń kúshterimiz qaýiptiń betin qaıtarýǵa qaýqarly», - deıdi departament ókili.

Oblys boıynsha sý tasqynyna qarsy is-sharalarǵa 399 adam, 130 tehnıka, 44 motopompa, 2 júzý quraly jumyldyrylǵan. Sońǵy úsh táýlik ishinde 1,7 mln tekshe metrden astam sý soryldy, 7,5 myń tonna ınertti materıal tógilip, 8 myńnan astam qapshyqtar tóselgen.