Atbasar aýdanynda sý tasqynyna baılanysty tótenshe jaǵdaı jarııalandy
KÓKShETAÝ. KAZINFORM – Búgin tańerteń Atbasar aýdanynda Jabaı ózenindegi sýdyń deńgeıi 5,95 metrge jetip, arnasynan asyp tasydy. Osyǵan baılanysty aýdan ákimi Amanbek Qaljanov turǵyndarǵa úndeý tastap, tótenshe jaǵdaı jarııalanǵanyn habarlady.
Ákimniń úndeýi Atbasar aýdany ákimdiginiń jelidegi resmı paraqshasynda jarııalandy.
«Bıylǵy jyldyń 11 sáýirinde Jabaı ózeninde sý deńgeıiniń kúrt ósýine baılanysty saǵat 04:43-te topyraqpen qorshalǵan bógetiń alty ýchaskesi buzylyp, sý qalaǵa kirdi. Sý deńgeıi tez kóterilip, qaýipti deńgeı 5,95 metrge jetti. Osyǵan baılanysty sý tasqyny qaýpi bar aımaqtyń barlyq turǵyndary úılerin bosatýy kerek. Qazirgi ýaqytta aýdanda tótenshe jaǵdaı rejımi jarııalandy», - dedi aýdan basshysy turǵyndarǵa.
Sonymen birge, aýdan ákimi turǵyndardy dúrbeleńge túspeýge shaqyrdy.
Sonymen qatar, Atbasar qalasynda № 2, 3, 5, 6, 7 orta mektepter jáne «Olımp» DSK, Balalardyń mýzyka mektebinde evakýatsııa pýnktteri uıymdastyrylǵan.
«Sý tasqynynan zardap shekken turǵyndarǵa zalal óteledi, ol úshin komıssııa qurylyp, zardap shekken úılerdi dereý tekseretin bolady. Meniń basshylyǵymmen aýdan ákimdigi janyndaǵy sý tasqynyna qarsy shtab uıymdastyryldy», - dep túıindedi Amanbek Qaljanov.
Aqmola oblysy TJD baspasóz qyzmetiniń málimetinshe, qazirgi kezde barlyq eskertý júıeleri dereý iske qosyldy. Turǵyndardy evakýatsııalaý, sondaı-aq obektiler men turǵyn úılerdi qorǵaý boıynsha is-sharalar júrgizilip jatyr.
Sonymen birge, sý kirgen aımaqtarda motopompalardyń kómegimen sý sorý jumystary qolǵa alynǵan. Oǵan Azamattyq qorǵaýdyń memlekettik júıesinen 400-den astam adam jáne 100 tehnıkasy jumyldyrylǵan.
Aıta ketsek, budan buryn Atbasarda taǵy 123 adam evakýatsııalanǵanyn jazǵan edik.
