Sý tasqynyn boljaý: Tasqyn júıesiniń tıimdiligi saralandy
ASTANA. KAZINFORM — Premer-mınıstrdiń orynbasary Qanat Bozymbaevtyń tóraǵalyǵymen 2025 jylǵy sý tasqyny kezeńiniń qorytyndysy jáne Tasqyn sý tasqynyn boljaý men modeldeý júıesin odan ári damytý máseleleri boıynsha keńes ótti. Іs-shara barysynda qoldanystaǵy mehanızmniń tıimdiligi saralandy. Bul týraly Úkimet málim etti.
Tótenshe jaǵdaılar mınıstrliginiń málimetinshe, bıyl sý tasqyny Aqmola, Mańǵystaý, Soltústik Qazaqstan oblystary men Abaı oblysynyń 16 eldi mekeninde tirkelgen. Sonyń ishinde 10 jaǵdaı RMK «Qazgıdromet» derekteri negizinde aldyn ala boljanǵan, 2 oqıǵa — halyqaralyq GloFAS platformasynyń málimetterimen qamtylǵan. Al erigen qar sýy men jer asty sýlarynyń kóterilýine baılanysty oryn alǵan 4 jaǵdaı boıynsha boljam jasalmaǵan.
Júrgizilgen taldaý nátıjeleri júıeni jetildirýdiń naqty baǵyttaryn kórsetti.
— Keńes qorytyndysy boıynsha Tasqyn júıesin jańǵyrtý kezeńderi men merzimderi aıqyndaldy. Sonymen qatar erigen jáne jaýyn-shashyn sýynyń aǵyny parametrlerin eskere otyryp gıdrologııalyq modeldi tolyqtyrý, gıdrobeketter jelisin keńeıtý, ózen arnalaryn batımetrııalyq túsirý, sý qoımalarynan tómen ornalasqan ózen ýchaskelerinde sý shyǵynyn boljaý, sondaı-aq 2024 jyly salynǵan bógetterdi eskere otyryp jer bederiniń tsıfrlyq modelderin jańartý jóninde naqty tapsyrmalar berildi, — delingen habarlamada.
Buǵan deıin habarlanǵandaı, Qanat Bozymbaev tabıǵı apattardan turǵyn úılerdi mindetti saqtandyrý júıesin ázirleý barysyn tekserdi.