Sý tasqyny: jańa úıler qaı jerge salynady – vıtse-mınıstr jaýaby

ASTANA. KAZINFORM – Tótenshe jaǵdaılar vıtse-mınıstri Baýyrjan Syzdyqov tasqyn saldarynan búlingen úılerdiń jańa ornyn arnaıy komıssııalar anyqtaıtynyn aıtty.

«Buǵan deıin tasqynnan zardap shekkenderdiń úıleri jańadan salynatyny aıtyldy. Jańa úıler qaıda salynady? Burynǵy ornynda boı kóterse, bir jyldan keıin qaıtadan sý almaıtynyna kim kepildik beredi?» - dep surady BAQ ókili.

Vıtse-mınıstr bul másele áli pysyqtalyp jatqanyn málim etti.

«Siz durys aıtyp tursyz. Biz ár jaǵdaıdan sabaq alýymyz kerek. Búgingi tańda Úkimet deńgeıinde jumys toby qurylǵanyn bilesiz. Qazir ákimdikter óz deńgeıinde de osyndaı komıssııalar qurdy. Olar oqıǵa oryndaryn zerttep, tekseredi. Bir de bir adam nazardan tys qalmaıdy. Osy komıssııalar men jumys toptary aqyldasa otyryp, saraptaı otyryp jańa úıler qaı jerge salynatynyn sheshedi. Bizdiń paıymdaýymyz boıynsha, ol úıler, árıne, qaýipsiz tustarda salyný kerek», - dedi Baýyrjan Syzdyqov.