Sý tasqyny jaǵdaıynda senatorlardyń negizgi mindetteri belgilendi
ASTANA. KAZINFORM - Senat Tóraǵasy Máýlen Áshimbaev Palata Bıýrosynyń otyrysyn ótkizip, sý tasqynynyń saldarynan óńirlerde qalyptasqan jaǵdaıǵa baılanysty senatorlardyń aldynda turǵan negizgi mindetterdi belgilep berdi. Sondaı-aq, is-shara barysynda depýtattar 3 sáýir kúni ótetin Senat otyrysynyń kún tártibin bekitti.
Máýlen Áshimbaev óz sózinde jaǵdaıdyń kúrdeli ekenine nazar aýdaryp, áriptesterin problemany sheshýge yqpal etý jáne aldaǵy ýaqytta mundaı oqıǵanyń qaıtalanýyna jol bermeý úshin kúsh jumyldyrýǵa shaqyrdy. Sondaı-aq ol bul másele Memleket basshysynyń erekshe baqylaýynda ekenin aıtty.
«Elimizdiń birqatar óńirinde kúrdeli jaǵdaı qalyptasyp otyr. Qarǵyn sý eldi mekenderdi basyp, joldar men kópirlerdi shaıyp ketip jatyr. Osyǵan baılanysty Memleket basshysy Úkimet pen jergilikti atqarýshy organdarǵa tótenshe jaǵdaıǵa qarsy turý jáne onyń zardaptaryn joıý jóninde naqty tapsyrmalar berdi. Prezıdentimiz basty mindet adam shyǵynyna jol bermeý ekenin basa aıtty. Mundaı qıyn jaǵdaıda memleket azamattardy jalǵyz qaldyrmaı, qoldaý kórsetetini anyq. Barlyq zardap shekkenderge jan-jaqty kómek kórsetiledi», – dedi Senat Tóraǵasy.
Sonymen qatar Palata Spıkeri óńirdegi turǵyndarǵa qoldaý kórsetý úshin Senat pen máslıhattardyń úılesimdi jumys isteýi mańyzdy ekenin atap ótti.
«Qazirdiń ózinde birqatar senatorlar óńirlerge baryp, jergilikti jerlerde atqarýshy organdarǵa qolǵabys kórsetip jatyr. Aldaǵy ýaqytta biz osy baǵyttaǵy keshendi jumysty kúsheıtip, máslıhat depýtattarymen birge jergilikti jerlerdegi problemalardy sheshýdiń tıimdi joldaryn izdeýimiz kerek», – dedi Máýlen Áshimbaev.
Palata otyrysynyń bekitilgen kún tártibine sáıkes senatorlar aldaǵy sársenbide «Eýrazııalyq ekonomıkalyq odaqqa múshe memleketterde ǵylymı dárejeler týraly qujattardy ózara taný týraly kelisimdi ratıfıkatsııalaý týraly» zańdy qaraıdy. Bul Qujat EAEO-ǵa múshe memleketter azamattarynyń ǵylymı dárejelerin eńbek kóshi-qony sheńberinde bes eldiń aýmaǵynda tanýdy kózdeıdi.
Osylaısha, EAEO elderiniń aýmaǵynda jumysqa ornalasqan jaǵdaıda fılosofııa doktory (PhD), beıindi doktor, ǵylym kandıdaty jáne ǵylym doktory sııaqty ǵylymı dárejeler rastaýsyz tanylady.
Odan bólek, Palata otyrysynda «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy avıatsııalyq izdestirý jáne qutqarý salasyndaǵy yntymaqtastyq týraly kelisimdi ratıfıkatsııalaý týraly» zań qaralady.
Zań Halyqaralyq azamattyq avıatsııa uıymynyń standarttary men usynylǵan tájirıbesine sáıkes apatqa ushyraǵan áýe kemeleriniń jolaýshylary men ekıpajdaryn izdeý jáne qutqarý úshin memleketter arasynda yntymaqtastyq ornatýdy maqsat tutady.
Sondaı-aq Bıýro otyrysynda Májilisten kelip túsken zańdar Senattyń turaqty komıtetterine bólinip berildi.
