Sý tasqynynan zardap shekken aqtóbelikter sotqa 182 shaǵym túsirdi

AQTÓBE. KAZINFORM - Sý tasqyny kezinde zardap shekken aqtóbelikter sotqa 182 shaǵym túsirdi. Olardyń biri malyn óteý týraly komıssııa sheshimin zańsyz dep tanýdy surady.

Sý tasqynynan zardap shekken keıbir aqtóbelikter komıssııa sheshimimen kelispeı, sotqa shaǵym túsirdi. Aqtóbe oblystyq soty baspasóz qyzmetiniń habarlaýynsha, barlyǵy 182 talap-aryz tússe, onyń 169-y qaralyp, 133 talap aryz medıatsııa tártibimen sheshildi. Qazirgi kezde úsh aqtóbeliktiń talaby qanaǵattandyryldy. Sonyń biri - Temir aýdanyndaǵy «Aılın» sharýa qojalyǵy. Qojalyq ıesi mal shyǵynyn óteýge qarsy bolǵan komıssııa sheshimin zańsyz dep tanýdy surady.

- Sharýa qojalyǵynyń basshysy Temir aýdany ákimdigine tabıǵı sıpattaǵy tótenshe jaǵdaılar saldarynan keltirilgen materıaldyq zııandy óteý týraly aryz jazdy. Al komıssııa sharýa qojalyǵynyń materıaldyq shyǵynyn tóleýden bas tartý sheshimin shyǵarady. Onda sý tasqyny kezinde joǵalǵan maldyń ólgen jeri týraly naqty aqparat usynylmaǵan, mal óleksesi bolmaǵan dep jazylǵan. Sharýa osy sheshimdi zańsyz dep tanýdy, qolaıly ákimshilik akt qabyldaýǵa májbúrleýdi suraǵan. Zańnamaǵa sáıkes atalǵan algorıtmde materıaldyq zııan maldyń óleksesi tabylǵan jaǵdaıda tólenýi tıis degen talaptar qarastyrylmaǵan. Bul jerde tólem aýyl sharýashylyǵy janýarlarynyń birdeılendirý bazasynyń málimetterine saı tólenedi dep kórsetilgen. Talap qoıýshy sharýa qojalyǵynyń talap aryzy qanaǵattandyryldy. Temir aýdandyq baǵalaý jónindegi komıssııasynyń sharýa qojalyǵyna materıaldyq shyǵyndy tóleýden bas tartý týraly hattamalyq sheshimi zańsyz dep tanyldy jáne kúshi joıyldy. Jaýapkerler sottyń quqyqtyq ustanymyn eskere otyryp ákimshilik aktini talap qoıýshynyń paıdasyna qabyldaýǵa mindetteldi,- dep habarlady Aqtóbe oblystyq sotynyń baspasóz qyzmeti. Sot sheshimi zańdy kúshine engen joq.

Aıta keteıik, Aqtóbede sharýalardyń qora, úı shyǵyny áli ótelgen joq.