Sý tasqyny týraly jalǵan aqparat taratqan 13 adam jaýapqa tartyldy – ІІM
ASTANA. KAZINFORM – Іshki ister mınıstrligi jalǵan aqparat taratqan adamnyń zań aıasynda jaýap beretinin taǵy da eske salady.
«Sý tasqynyna qatysty jalǵan aqparat taratqan 13 adam ákimshilik jaýapkershilikke tartyldy jáne 2 qylmystyq is qozǵaldy. Atap aıtqanda, Soltústik Qazaqstan oblysynda 7 adam, Astana qalasy men Mańǵystaý oblysynda 2 adam, Atyraýda 1 adam jáne BQO-da 1 adam jaýapqa tartyldy. Jalǵan aqparatty bilmestikten taratý zań boıynsha jaýapkershilikten bosatpaıdy, biz ony birneshe ret eskerttik», - dedi mınıstrliktiń resmı ókili Shyńǵys Alekeshev «Biz birgemiz» jalpyulttyq telemarafonyna qatysa otyryp.
Onyń aıtýynsha, jalǵan aqparattyń deni gýmanıtarlyq kómek urlanyp jatyr, ákimdikter ózderine ıelenýde, adam ólimi men mal qyryldy degen sarynda.
«Jalǵan aqparatpen kúres jalǵasyp jatyr, monıtorıng júrgizip otyrmyz. Osy oraıda jalǵan aqparat taratqan jaǵdaıda ákimshilik jáne qylmystyq jaýapkershiliktiń baryn eske salamyz», - deıdi vedomstvonyń resmı ókili.
