Sý tasqyny: SQO-daǵy Bolshaıa Malyshka aýylynyń turǵyndary qaýipsiz jerge shyǵaryla bastady
PETROPAVL. KAZINFORM — Petropavlda Esil ózeniniń sý deńgeıi 1181 sm-ge kelip toqtady. Óńirde áli de qaýipti jaǵdaı saqtalǵan.
Soltústik Qazaqstan oblystyq polıtsııa departamenti baspasóz qyzmetiniń málimetinshe, búgin tańerteńnen tártip saqshylary jergilikti atqarýshy organdarmen birlesip, Qyzyljar aýdany Bolshaıa Malyshka aýylynan turǵyndardy qaýipsiz jerge shyǵara bastady.
Qazirgi ýaqytta aýyldyń 20-dan astam turǵyny jataqhanaǵa ornalastyryldy, taǵy 50-ge jýyq adam ýaqytsha týystaryna kóshti.
Jaǵdaı baqylaýda. Aýylda aýdandyq polıtsııa bóliminiń qyzmetkerleri, sondaı-aq vedomstvo bastyǵy Aıdyn Qabduldınov bastaǵan PD apparaty jumys istep jatyr. Polıtseıler qoǵamdyq tártipti saqtaýdy qamtamasyz etip, jergilikti bılikke járdemdesip, halyqqa jan-jaqty kómek kórsetip jatyr.
Polıtsııa qyzmetkerleri úı-úıdi aralap, turǵyndarǵa sý deńgeıiniń kóterilýine baılanysty, úılerin ýaqytsha qaldyrý qajettigin túsindirdi. Tártip saqshylary múlikti qaýipsiz jerge shyǵaryp, turǵyndardyń ótinishterin oryndap, turmystyq máselelerdi sheshýge járdemdesip jatyr.
Sondaı-aq aýyl mańyna sý kirmeý úshin úıilgen úıindiler bekitilip jatyr.
Tasqynmen kúreske Ulttyq ulan áskerı qyzmetshileri de jumyldyrylǵan. Olar 200 myńnan astam qum-balshyq toltyrylǵan qapshyq daıyndady.