Sý tasqyny. SQO-da zardap shekkenderge úı salǵan kompanııalarǵa 400 mln teńge tólenbedi
PETROPAVL. KAZINFORM — Soltústik Qazaqstan oblysynda 14 qurylys kompanııasy jergilikti «Qyzyljar Asar» korporatıvtik qorynan tıisti qarajatty ala almaı otyr.
SQO kásipkerler palatasy baspasóz qyzmetiniń málimetinshe, bul másele kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste talqyǵa tústi.
Byltyr maýsym aıynda «Birlik» shaǵyn aýdanynda úılerdi salý úshin 14 qurylys kompanııasy, SQO ákimdiginiń qurylys, sáýlet jáne qala qurylysy basqarmasy jáne «Qyzyljar Asar» korporatıvtik qory kelisimshartqa otyrdy. Zardap shekkenderdiń barlyǵy 1 qazanda jańa úılerine qonystandy.
— Jumys tolyq, áli sapaly oryndalýyna qaramastan, kompanııalar áli tolyq tólem alǵan joq. Іs júzinde tólem jasaldy, mysaly, «Ash stroy» JShS oryndalǵan jumystardyń 25% úshin ǵana aqsha aldy. Al úıler ótken jyldyń qazan aıynda paıdalanýǵa berildi, — deıdi SQO kásipkerler palatasynyń sarapshysy Olga Dostler.
Mamannyń aıtýynsha, «Qyzyljar Asar» jeke korporatıvtik qory kásipkerlik qyzmetpen aınalyspaıdy, jeke jarnalar esebinen jumys isteıdi.
— Biz nazar aýdarǵan ekinshi másele, bıznes sýbektileri shart talaptaryna sáıkes qurylys basqarmasynyń áreketterine tolyǵymen táýeldi. Tapsyrys berýshi kásipkerlerden qujattardy qabyldaıdy, óz betinshe tolyq paketti qalyptastyrady, sosyn tóleýshige, ıaǵnı qorǵa jiberedi. Osylaısha, kásipkerler bul rásimge qandaı da bir túrde áser ete almaıdy jáne qujattardy qorǵa tikeleı jibere almaıdy, — deıdi Olga Dostler.
Qol qoıylǵan úshjaqty shartqa sáıkes kásipkerler júktelgen barlyq mindettemeni oryndaǵan.
— Ákimdik bizge qurylysty shuǵyl bastaý týraly ótinish bildirgen kezde, biz bárimiz qoldadyq, kóbisi nesıege kirip, qaryzǵa aqsha alyp, iske kiristi. Jumysshylardy eńbekaqyny kútýge kóndirdik. Biz bárimiz qıyndyqqa tap bolǵan adamdar sport zaldary men jataqhanalarda turatynyn túsindik. Alǵashqy úıler boıynsha tólem júrgizildi jáne eshkim mundaı problema týyndaıdy dep kútken joq. Meniń kásipornym «Ash stroy» JShS bereshek 88,5 mln teńge, sharttyń jalpy somasy 118 mln teńge. Osyǵan uqsas problemalar taǵy 13 kompanııada bar. Bereshektiń jalpy somasy 400 mln teńgeden asady. Bizdiń kópshiligimiz sharttarǵa qol qoıylýyn kútpeı jumysqa kiristik, — deıdi «Ash stroy» JShS dırektory, SQO kásipkerler palatasy qurylys saraptamalyq keńesiniń tóraǵasy Ámirjan Shákeı.
Otyrysqa qatysqan «Qyzyljar Asar» korporatıvtik qorynyń dırektory Qanat Omarov bul úıler qurylysynyń negizgi demeýshisi Kaz Minerals Bozshakól kompanııasy ekenin túsindirdi. Al korporatıvtik qor bul jerde tek operator ispettes.
— Biz olarmen shart jasastyq, oǵan sáıkes Kaz Minerals Bozshakól úsh transhpen demeýshilik qarajat bólýi kerek. Birinshi transh maýsym aıynda, ekinshisi shildede tústi. Úshinshi transh bolǵan joq. Sonymen, nege bul aqsha kelmedi? Másele mynada, Jańa jylǵa deıin úılerdi paıdalanýǵa berý aktileri áli bolǵan joq. Mine, qurylys basqarmasynyń ókilderi osynda otyr. Men olarmen birneshe ret sóılestim, bul demeýshilik aqsha. Demeýshi qarsy emes. Sizderden rastaıtyn qujattar bar. Bizge osy 80 úıdiń paıdalanýǵa berilgendigi týraly kirý aktileri qajet, — dedi Qanat Omarov.
Alaıda shartqa sáıkes kásipkerler ózderinen tıesili bar qujatty tapsyrǵan.
— Naqty oryndalǵan jumys úshin tólem jasaýǵa qajet qujattar tapsyrylǵan. Nysandy qabyldaý aktisi boıynsha shart somasynyń qalǵan 5% ǵana, ıaǵnı qorytyndy tólem jasalýy tıis. Sondyqtan siz osy úılerdi paıdalanýǵa berý týraly aktilerdiń joqtyǵyn alǵa tartyp, oryndalǵan jumys kólemi úshin tólem jasamaı otyrsańyz — bul sizdiń tarapyńyzdan zańsyz, — dedi Olga Dostler.
Osydan keıin qor ókili 10-ǵa jýyq kompanııanyń elektrondyq shot-faktýralardy usynbaǵanyn aıtty. Sózinshe, demeýshi barlyq kompanııaǵa bir jalpy transh arqyly aqsha jiberedi eken.
Bir qyzyǵy, SQO ákimdigi qurylys, sáýlet jáne qala qurylysy basqarmasy basshysynyń orynbasary Serikjan Shıtqanov qujattardyń tolyq paketin jańa jylǵa deıin qorǵa jibergenin sendirdi.
Tólem boıynsha bereshek máselesi birinshi ret kóterilip otyrǵan joq. Buǵan deıin bul máselemen merdigerler oblys ákiminiń orynbasaryna bardy. Onda olardy aqshanyń túsetinine sendirip, qujattardyń tolyq emestigi týraly bir aýyz sóz aıtpaǵan.
Kásipkerlerdiń quqyqtaryn qorǵaý jónindegi keńes bul máseleni baqylaýǵa aldy. Endi kásipkerler bir táýlik ishinde joǵalǵan qujatty jetkizýi tıis, al qor óz kezeginde bir apta ishinde qalǵan qarajatty tóleýge ýáde berdi.
Buǵan deıin ádildik izdegen SQO turǵyny Oleg Aab jaıly jazǵan edik.