Sý tasqyny: Respýblıka boıynsha 31 myńnan astam adam úıine oraldy
ASTANA. KAZINFORM – Jaıyq ózeni sý deńgeıiniń birtindep tómendep kele jatqany baıqalady. Bul týraly TJM ókili Asqar Shárip aıtty.
«Atyraý, Aqtóbe, Batys Qazaqstan jáne Soltústik Qazaqstan oblystarynda sý tasqynyna qarsy is-sharalar, sý tasqyny saldaryn joıý jáne halyqqa kómek kórsetý boıynsha jumystar jalǵasýda. Batys Qazaqstan oblysynda, Oral qalasynda Jaıyq ózeniniń sý deńgeıi birtindep tómendep jatqany baıqalady, sý deńgeıine monıtorıng jalǵasyp jatyr. Qazirgi ýaqytta úılerdi sý basý oqıǵasy tirkelgen joq. Saıajaıda qalyp qoıǵan turǵyndardyń bar-joǵyn tekserý úshin aralaý jumysy áli de jalǵasady», - dedi ol Ortalyq kommýnıkatsııalar qyzmetindegi brıfıngte.
Onyń dereginshe, osy saǵatta respýblıka boıynsha 31 112 adam úılerine oraldy. 8 566 adam, onyń ishinde 3 718 bala evakýatsııalaý pýnktterinde qalyp otyr.
«5 677 turǵyn úı men 2 584 aýla aýmaǵynan sýdyń baǵyty burylyp, sý soryldy. 11,7 mln astam tekshe metr erigen qar sýy soryp shyǵaryldy, 5,5 mln qapshyq jáne 1,5 mln astam tonna ınertti materıal tóseldi. Jedel jeli telefonyna 2 205 qońyraý tústi. Apattyq-qutqarý jáne sý tasqynyna qarsy jumystarǵa 32 myńnan astam adam, 4 myń tehnıka, 773 sý sorý quraly, 294 júzý quraly, 13 áýe kemesi jumyldyryldy», - dedi Asqar Shárip.
