Sý tasqyny otandastarymyzdyń aýyzbirshiligi men azamattyq jaýapkershiligin aıqyn kórsetti – Aleksandr Ýrmashov
ASTANA. KAZINFORM - Sý tasqyny otandastarymyzdyń aýyzbirshiligi men azamattyq jaýapkershiligin aıqyn kórsetti. Mundaı pikirdi Qaraǵandy oblysyndaǵy «Assambleıa jastary» uıymy ókildiginiń tóraǵasy Aleksandr Ýrmashov bildirdi.
«Qazaqstan halqy Assambleıasynyń «Birlik. Jasampazdyq. Órleý» atty HHHІІІ sessııasy elde jáne álemde bolyp jatqan jaǵdaılardyń aıasynda mańyzdy saıası oqıǵaǵa aınaldy. Іskerlik stıl men onlaın formatta ótkizilgen sessııa eldiń ishki jáne syrtqy saıasatynyń kóptegen ózekti máselelerine tolyq ári naqty jaýap berdi. Sessııada búkil qoǵamdy – qutqarýshylar men eriktilerdi, memlekettik qyzmetshiler men bıznes ókilderin, azamattyq belsendileri men elimizdiń barlyq óńiri jastarynyń biriktirý máselesine basa nazar aýdaryldy», - dedi ol sessııa otyrysynan keıin agenttik tilshisine bergen suhbatynda.
Sonymen qatar ol sý tasqynmen kúreske qoǵam belsendileri zor úles qosqanyn, eriktiler zardap shekkenderge kómek kórsetip, gýmanıtarlyq kómek jınaý isine uıymdastyryp jatqanyn basa aıtty.
«Bul otandastarymyzdyń aýyzbirshiligi men azamattyq jaýapkershiligin aıqyn kórsetti. Eń bastysy Prezıdent zardap shekkenderdiń barlyǵyna keltirilgen zalal ótelip, bul qıyndyqpen eshkim jalǵyz qalmaıtyndyǵyna sendirip otyr. Ol úshin elimizde bıýdjet shyǵystary qysqartylyp, qarajatty únemdeýdiń qatań rejımi engiziledi. El turǵyndarynyń qalypty ómirge múmkindiginshe tezirek oralýy úshin memleket bárin jasaıtyn bolady», - dedi Aleksandr Ýrmashov.