Orynbordaǵy Irıkla sý qoımasynan sekýndyna 1600 tekshe metr sý jiberilip jatyr

ORAL. KAZINFORM — Orynbor oblysyndaǵy Irıkla sý qoımasynan sekýndyna 1600 tekshe metr sý jiberilip jatyr. Bul týraly «Qazsýshar» RMK Batys Qazaqstan fılıalynyń basshysy Raýan Husaıynovqa Tómengi Edil basseındik sý basqarmasy Orynbor oblysy boıynsha sý resýrstary bóliminiń bastyǵy Sergeı Rıdel málim etti.

S. Rıdel muny Jaıyq ózeni basseıninde qalyptasyp otyrǵan gıdrologııalyq jáne sý sharýashylyǵy jaǵdaıymen, Irıkla sý qoımasyna quıylyp jatqan aǵystyń kóbeıýimen túsindirgen.Osylaısha, Irıkla qoımasynan sý jiberý bir táýlik ishinde áldeneshe ret ósti. Aıtalyq, keshe atalǵan qoımadan sekýndyna 790 tekshe metr sý bosatylǵan edi.

«Qazgıdromet» RMK BQO fılıalynyń dırektory Tilegen Shapanovtyń búgingi saǵat 12.00-de bergen málimeti boıynsha Jaıyq ózenindegi sý deńgeıi Báıterek aýdany ıAnvartsev aýyly tusynda 702 (qaýipti shegi — 1250 sm), Oralda 592 (850) santımetrge jetti. Shaǵan ózeni Chývashın tusynda qaýipti deńgeıden (1300) 5 santımetrge asyp ketti. Al Derkól ózeniniń deńgeıi Beles aýylynda 25 santımetrge tómendedi.

«Irıkla qoımasynan jiberilgen sý Jaıyqqa qosylyp, odan Batys Qazaqstan jáne Atyraý oblysy aýmaqtary arqyly Kaspıı teńizine quıylady», - dedi T. Shapanov.

Eske sala keteıik, budan buryn BQO-da Jaıyq ózeniniń deńgeıi 850 santımetrge jetýi yqtımal ekendigin jazǵan bolatynbyz.