Sý tasqyny: Oralda sot qala ákimin komıssııa sheshimin qaıta qaraýǵa mindettedi

ORAL. KAZINFORM – Oral qalasynda turatyn ekinshi top múgedeginiń turǵyn úıimen qosa saıajaı ýchaskesi ótken jylǵy tasqyn kezinde sý astynda qaldy.

BQO sotynyń baspasóz qyzmetinen túsken málimetke qaraǵanda, bul áıeldiń otbasymen birge turatyn jalǵyz baspanasy boldy. 

Alaıda Oral qalasy ákimdiginiń materıaldyq zııandy (zalaldy) baǵalaý jáne óteý jónindegi komıssııasy talapkerdiń menshiginde ózge de baspanasy bar dep oǵan turǵyn úı berýden bas tartty. 

Sý tasqynynan zardap shekken azamatsha sotqa isin joldaı otyryp, komıssııanyń sheshimin zańsyz dep tanýdy surady. Áıel úıiniń turýǵa jaramsyzdyǵyn atap ótti jáne dálel retinde onyń apattyq jaǵdaıy týraly tehnıkalyq qorytyndy usyndy.

BQO mamandandyrylǵan aýdanaralyq ákimshilik soty isti qaraǵan kezde anyqtalǵanyndaı, talapkerdiń atyndaǵy jyljymaıtyn múlik 2015 jyly satyp alynǵan jáne bankte kepilge qoıylǵan. Nesıeni óteý múmkindigi bolmaýyna baılanysty 2016 jyly páter basqa adamǵa kelesi sharttarmen satyldy: satyp alýshy talapkerge 2,7 mln teńge kóleminde qolma-qol aqsha berdi, qalǵan somany nesıeni tolyq ótegenge deıin bankke tólep júrdi. Sóıtip, bankke nesıelik mindettemeler boıynsha tólemderdi satyp alýshy júrgizdi, bul is materıaldaryna qosa tirkelgen kiris kassalyq orderlerimen rastalady. 

Nesıeni tolyq ótegennen keıin 2024 jyldyń 16 shildesinde satyp alýshy men talapker arasynda múlikti satyp alý-satý sharty jasaldy. 

Osylaısha, sot talapkerge tıesili páter 2016 jyldan bastap basqa adamnyń paıdasyna berilgenin anyqtady. Mundaı jaǵdaıda sot talapkerdiń 2024 jylǵy shildede páterdi satý jónindegi is-áreketteri jańa turǵyn úı alý maqsatynda múlikti qasaqana ıelikten shyǵarýdy kýálandyrmaıdy degen qorytyndyǵa keldi. 

- Talapkerdiń turǵan úıinde gazben jylytý jáne elektrmen jabdyqtaý quraldary boldy, bul onda jyl boıy turǵanyn kórsetedi. Ekinshiden, tehnıkalyq qorytyndyǵa sáıkes turǵyn úıdiń negizgi qurylys konstrýktsııalary syn kótermeıdi, ǵımarat apatty jaǵdaıda jáne buzylýǵa jatady. Osyǵan baılanysty sot talapty qanaǵattandyrdy, komıssııanyń sheshimi zańsyz dep tanyldy jáne kúshi joıyldy. Qala ákimine talapkerge qatysty komıssııanyń sheshimin qaıta qaraý tapsyryldy. Sheshim zańdy kúshine endi, - dep habarlady vedomstvodan.

Eske sala keteıik, budan buryn Batys Qazaqstanda sot sheshimimen jer daýyna núkte qoıylǵanyn jazǵan edik.