Sý tasqyny: Oral túrmesindegi sottalýshylar elimizdiń basqa óńirlerine kóshirildi

ORAL. KAZINFORM — Sý basý qaýpi tónýine baılanysty Oral qalasyndaǵy túzetý mekemesinen jazasyn óteýshiler kóshirildi.

BQO qylmystyq-atqarý júıesi departamentiniń baspasóz qyzmetinen málim etkendeı, Jaıyq ózeninde sý deńgeıiniń kóterilýine baılanysty osyndaı sheshim qabyldanǵan.

«№ 27 túzetý mekemesinde jazasyn óteýshiler Qazaqstannyń basqa óńirlerine evakýatsııalandy.  Atap aıtqanda, Aqtóbe, Taraz, Shymkent jáne Qyzylordaǵa kóshirildi» dep habarlady vedomstvodan. 

Sonymen qatar turǵyndar jazasyn óteýshilerdiń kolonnamen evakýatsııalanǵany jónindegi beınejazbany áleýmettik jelige júktep, bólisip jatyr.

Eske sala keteıik, budan buryn Májilis depýtaty Edil Jańbyrshın sý tasqyny kezinde bárine daıyn bolýymyz kerek ekenin aıtqan edi. 

Sondaı-aq Jaıyq ózenindegi sý deńgeıi Oralda bir táýlikte 13 santımetrge kóterildi.

Oral qalasy ákimdigi qaýipti aýmaq turǵyndaryna kóshýge daıyn bolý kerektigin eskertti.