Sý tasqyny: Oral qalasyndaǵy mektepter qashyqtan bilim berýge kóshedi

ORAL. KAZINFORM - Sý tasqynyna baılanysty Oral qalasynda barlyq mektep erteńnen bastap onlaın oqytýǵa kóshedi.

Oral qalasy bilim berý bóliminen málim etkenindeı, óńirdegi tótenshe jaǵdaı ýaqytynda balalardyń qaýipsizdigin qamtamasyz etý maqsatynda bilim berý uıymdarynyń pedagogıkalyq keńesi osyndaı sheshim qabyldady.

«15 sáýirden bastap qala mektepteri men qosymsha bilim berý uıymdarynda oqý protsesi onlaın formatta Bilimland.kz jáne Daryn.online platformalarynda uıymdastyrylady. Oqýshylardy tehnıkalyq oqytý quraldarmen qamtý jumysy oılastyrylýda. Ata-analardan balalardyń qaýipsizdigin únemi qadaǵalaý suralady. Balabaqshalar ázirge shtattyq rejımde jumys jasaıdy», - dep habarlady vedomstvodan.

BQO bilim basqarmasy baspasóz qyzmetiniń naqtylaýynsha, Aqjaıyq, Báıterek, Bórli, Terekti aýdandarynyń mektepteri men qosymsha bilim berý uıymdary jáne Oral qalasyndaǵy kolledjder de onlaın oqıdy.

Eske sala keteıik, budan buryn Jaıyq ózeniniń Oral qalasy tusyndaǵy deńgeıi 755 santımetrge jetkenin jazǵan bolatynbyz.