Sý tasqyny: Oral qalasynda taǵy 200-ge jýyq otbasyna jańa baspana berildi

ASTANA. KAZINFORM — Oral qalasyndaǵy «Juldyz» shaǵynaýdanynda kóktemgi sý tasqynynan zardap shekken 192 otbasy baspanaly boldy.Keshe Derkól kentinde 103, Zachaganda 80 otbasyna jeke turǵyn úı kiltteri tabys etilgen edi.

Osylaısha, Oralda saıajaılarda jalǵyz baspanasy turýǵa jaramsyz dep tanylǵandar arasynan 375 otbasy jeke úıge qol jetkizdi.

«Juldyz» shaǵynaýdanynda turǵyn úı kiltterin saltanatty túrde tabystaǵan oblys ákimi Narıman Tóreǵalıev jańa qonys ıelerin quttyqtady.

«Kóktemgi tasqyn kezinde qalanyń shetindegi saıajaılardy sý basyp, turǵyndar qıyn jaǵdaıǵa tap boldy. Qazir Memleket basshysynyń tapsyrmasymen baspanasyz qalǵan azamattardy turǵyn úımen qamtý jumysy júrgizilip jatyr. Kúni keshe Zachagan jáne Derkól kentterinen 183 otbasyǵa jańa úı bersek, búgin, mine, «Juldyz» shaǵynaýdanynan taǵy 192 úıdiń kiltin tabystap jatyrmyz. Osy shaǵynaýdanda úılerdi merziminde ári sapaly etip salǵan 17 merdiger mekemege rızashylyǵymdy bildiremin. Sondaı-aq jeke turǵyn úılerdiń qurylysyna demeýshilik jasaǵan «ERG» kompanııasynyń basshylyǵyna turǵyndar atynan alǵysymdy jetkizgim keledi», - dedi óńir basshysy.

Narıman Tóreǵalıev óz sózinde jańa turǵyn úıler ornalasqan shaǵynaýdanǵa aldaǵy ýaqytta asfalt tóseletinin, sondaı-aq balalar oıyn alańy salynatynyn atap ótti.

Іzgi tilegin jetkizgen oblys ákimi ár shańyraqqa baq-bereke tiledi.

Oral qalasynda kúni búginge deıin sý tasqynynan zardap shekken otbasylarǵa 1 548 úı berildi.

Eske sala keteıik, budan buryn Oralda tasqynnan japa shekkenderge arnalǵan úıler qalaı salynyp jatqanyn jazǵan bolatynbyz.

Sondaı-aq Oraldaǵy Derkól kentinde 100-den astam turǵyn úıdiń kilti berildi.