Sý tasqyny: Oral qalasynda qum toltyrylǵan 125 myń qapshyq daıyndaldy
ORAL. KAZINFORM — Batys Qazaqstan oblysynda Jaıyq ózeniniń deńgeıi kóterilý ústinde.
«Qazgıdromet» RMK BQO fılıalynan málim etkenindeı, 10 sáýir kúngi tańǵy saǵat 08.00-degi málimet boıynsha ózen deńgeıi Oral qalasy tusynda 718 santımetrge (táýliktik ósim – 8 sm) jetti. Sondaı-aq Kóshim gıdrobeketinde 675 (+22), Taıpaqta 390 (+17) santımetrdi kórsetti.
Oblysta basqa barlyq ózenderdiń deńgeıi tómendedi.
«Qazsýshar» RMK Batys Qazaqstan fılıalynan alynǵan málimetke qaraǵanda, Orynbor oblysyndaǵy Irıkla sý qoımasynan Jaıyq ózenine keshegideı, sekýndyna 1 342 tekshe metr sý jiberilip jatyr. Bıyl munda sý jiberýdiń eń kóp kólemi sekýndyna 2 170 tekshe metrge jetse, ótken jyly 15 tekshe metrden aspaǵan bolatyn.
Oral qalasy ákimdiginiń habarlaýynsha, shaharda tabıǵı sıpattaǵy tótenshe jaǵdaı jarııalanǵannan beri quzyrly mekemeler kúsheıtilgen rejımde jumys jasaýda. Ózen jaǵalaýyn bekitý arnaıy tehnıkalardyń kómegimen túngi ýaqytta da júrgizilýde.
Polıtsııa qyzmetkerleri turǵyndar evakýatsııalanǵan saıajaılarda kezekshilik uıymdastyryp, urlyqty boldyrmaý úshin kúni-túni kúzetýde.
Asan mańyndaǵy polıgonda qum toltyrylǵan qapshyqtar úzilissiz daıyndalýda. Bul jumysqa qaladaǵy memlekettik jáne jekemenshik mekemelerdiń, áskerı bólimderdiń, zaýyt-kásiporyndardyń qyzmetkerlerimen qatar volonterlar belsendi atsalysýda. Sonymen qatar oblys ortalyǵy ǵana emes, aýdandardan kelgen volonterlar sý tasqynynyń aldyn alýǵa úles qosýda. Máselen, keshe kúndiz Tasqala, túnde Syrym aýdanynyń eriktileri polıgonda qapshyqtar daıyndady.
«Kúni búginge deıin qum toltyrylǵan 125 myń qapshyq ázirlendi. Taǵy 80 myńy daıyndalyp, Jaıyq ózeni jaǵalaýyndaǵy qaýipti tustarǵa tóseledi. Ózen jaıylmalarynda ornalasqan saıajaı turǵyndaryn evakýatsııalyq pýnktterge jetkizýge 30 avtobýs bólindi», - dedi Oral qalasy ákiminiń orynbasary Jandos Dúısenǵalıev.
«Apat aıtyp kelmeıdi, Syrym aýdanynan Oral qalasyna járdemdesýge kelip jatyrmyz. Sportshylar, muǵalimder, turǵyndar kómek qolyn sozýdamyz. Kúsh biriktirsek qana tasqyn sýǵa tosqaýyl qoıa alamyz», - dedi Syrym aýdanynan kelgen erikti Erjan Shúkirov.
Eske sala keteıik, budan buryn Qyrǵyz elinen Batys Qazaqstan oblysyna 80 tonna gýmanıtarlyq júk jetkizilgenin jazǵan bolatynbyz.
