Sý tasqyny: Óńirlerdegi qazirgi jaǵdaı qalaı
ASTANA. KAZINFORM – Tótenshe jaǵdaılar mınıstrligi Tótenshe jaǵdaılardy joıý departamentiniń bastyǵy Qaharman Orazalın el aýmaǵyndaǵy sý tasqynynyń jaǵdaıy týraly sońǵy málimettermen bólisti.
«Sý tasqyny bastalǵaly beri azamattyq qorǵanystyń kómegimen 62 myńǵa jýyq adam, onyń ishinde 15 myńnan astam bala jáne 45 múmkindigi shekteýli azamat qaýipsiz jerge jetkizildi. Ýaqytsha ornalasý pýnkterine 13 myńnan astam adam, onyń ishinde 6 800-ge jýyq bala evakýatsııalandy. Tótenshe jaǵdaılar Qorǵanys mınıstrligi jáne Ulttyq ulannyń áýe kemelerimen 2 607 adam, onyń ishinde 760 bala qaýipsiz jerge ornalastyryldy. Tótenshe jaǵdaılar mınıstrligi jáne jergilikti atqarýshy organdardyń kómegimen 7 mln tekshe metrden astam sý soryldy, sonymen qatar 911 myńnan astam qap, 907 tonna ınertsııa materıal tóseldi. Búginde qutqarý jumystaryna 900 myńnan astam adam, 2 myń birlik tehnıka jáne 500-ge jýyq júzý, sý aıdaý quraldary jumyldyryldy», - dedi Qaharman Orazalın Ortalyq kommýnıkatsııalar qyzmeti alańynda ótken baspasóz máslıhatynda.
Odan bólek, qutqarý jumystaryna Qorǵanys mınıstrligi jáne Ulttyq ulannyń 10 áýe kemesi tartylǵan.
«Qazirgi ýaqytta Atyraý, Aqtóbe, Aqmola, Qostanaı, Soltústik Qazaqstan oblysy jáne Pavlodar oblysynda 3365 jeke turǵyn úı, 200 aýla aýmaǵy jáne 1059 saıajaı sý astynda qaldy. Sondaı-aq, respýblıkalyq, oblystyq jáne jergilikti mańyzy bar sý shaıǵan 85 avtojol jáne sý júrgen 135 jol respýblıkalyq shtabtyń baqylaýynda», - deıdi ol.
